Nibura abaterabwoba 70 ba al-Shabaab bishwe ku Cyumweru mu gikorwa cya gisirikare cyakozwe n’ingabo z’igihugu cya Somaliya gishyigikiwe n’imitwe yitwara gisirikare yo mu majyaruguru yo hagati mu Ntara ya Mudug.
Izo ngabo zagabye igitero ku bwihisho bw’inyeshyamba za al-Shabaab n’ahantu ziteranira mu mujyi wa Aad nk’uko iyi nkuru dukesha Anadolu Agency ivuga.
Nk’uko byatangajwe na Minisitiri wungirije ushinzwe amakuru muri Somaliya, Abdirahman Yusuf Al Adala, waganiriye n’ibitangazamakuru byaho, ngo abayobozi b’umutwe w’iterabwoba bari mu bishwe muri iki gikorwa.
Minisiteri y’ingabo ya Somaliya, na yo yemeje iki gikorwa, yagize ati: “Ibikorwa bya gisirikare biherutse kubera i Mudug na Galgaduud byagize ingaruka zikomeye kuri Khawarij (irindi zina leta yahaye Al Shabab risobanura kunyuranya na Islam)n’abarwanyi bayo.”
Iki gikorwa kibaye nyuma y’umunsi umwe ikamyo yari itezemo igisasu iturikiye kuri bariyeri ya gisirikare mu mujyi rwagati wa Beledweyne ihitana abantu barenga 18, barimo abashinzwe umutekano 10, abandi barenga 40 barakomereka.
Minisiteri y’ingabo ya Somaliya ivuga ko ku wa Gatandatu, igitero cy’indege mu mujyi wa Elbur ugenzurwa na al-Shabaab cyibasiye inzu yaberagamo inama cyahitanye abayobozi bakuru ba al-Shabaab.
