Kuri uyu wa gatatu, tariki ya 11 Ukwakira,Ubuyobozi bw’ Umuryango w’Abibumbye (UN) ishami rishinzwe kubungabunga umutekano muri Repubulika Iharanira Demokarasi ya Kongo (MONUSCO), bwatangaje ko bwafashe ingamba zikomeye zo guta muri yombi bamwe mu basirikare bayo babungabunga amahoro bakekwaho imyitwarire igayitse.
Nk’uko bigaragara mu nyandiko za MONUSCO ,Abasirikare umunani boherejwe i Beni, mu burasirazuba bwa DRC, batawe muri yombi ku ya 1 Ukwakira bakurikiranyweho gusambanya ku gahato n’ihohoterwa rikorerwa abagore muri Congo.
Aba basirikare bose batawe muri yombi bivugwa ko ari abo muri Afurika Y’Epfo, aho barenze ku mabwiriza n’amategeko agenga ingabo z’Umuryango w’Abibumbye arwanya ihohoterwa iryariryo ryose by’umwihariko irishingiye ku gitsina .
Ku mugoroba wo kuri uyu wa gatatu, MONUSCO yagize ati: “Ibiro bya serivisi ishinzwe kugenzura ibikorwa by’imbere, byafashe ingamba zo guta muri yombi abasirikare umunani bakurikiranyweho gusambanya abagore ku ngufu.Mu nshingano zacu harimo gukumira ihohotera iryariryo ryose na politiki yo kutihanganirana na gato ikibi.”
Aba basirikare batawe muri yombi mu gihe, ingabo za MONISCO zahawe kuba uyu mwaka uzarangira zarakuye akarenge muri Repuburika Iharanira Demokarasi ya Congo.Ni nyuma y’uko izi ngabo zagiye zishinjwa kuba nta ruhare rwazo rwagaragaye mu kugarura amahoro muri kiriya gihugu.
Ziherutse kandi kuba intandaro y’imyigaragambyo iherutse kubera mu mujyi wa Goma yakurikiwe n’impfu z’abaturage barenga 50 bayiciwemo n’ingabo za Leta nyuma y’uko bigaragambije bamagana iyi MONISCO.
