Umugore wa Perezida Ali Bongo, uherutse guhirikwa ku butegetsi muri Gabon, yatawe muri yombi nk’uko umwunganizi we mu mategeko yabitangarije AFP kuri uyu wa Kane.
Abasirikare ba Gabon bahiritse ubutegetsi ku itariki ya 30 kanama, basesa ibyavuye mu matora nyuma gato yo gutangaza ko Perezida Bongo yatsinze, bavuga ko amatora atari yizewe.
Ali Bongo wari ku butegetsi kuva mu 2009, yagiyeho asimbura se, Omar Bongo, wari umaze imyaka 42 ku butegetsi.
Sylvia Bongo Ondimba Valentin,ushinjwa kunyereza umutungo wa leta, yafunzwe kuri uyu wa gatatu ushize nk’uko umunyamategeko we, Francois Zimeray , uvuga ko itabwa muri yombi rye rinyuranyije n’amategeko, yabitangarije ikinyamakuru cyavuzwe haruguru.
Umugore wa Perezida Bongo kuwa 28 Nzeri yashinjwe ibyaha birimo iyezandonke, guhimba no gukoresha inyandiko mpimbano n’ibindi.
Yari afungiwe iwe mu rugo mu murwa mukuru, Libreville guhera kuwa 30 Kanama haba coup d’etat’s yarangije imyaka 55 y’ingoma ya ba Bongo.
Abahiritse ubutegetsi bashinja Sylvia Bongo n’umuhungu we, Nourredin Bongo Valentin, kuba barayobeje uwahoze ari perezida, wari utarakira neza indwara ikomeye mu mwaka wa 2018.
Bavuga ko aba bombi ari bo bari bayoboye igihugu cya Gabon gikungahaye kuri peteroli mu myaka itanu ishize kandi bakoresheje nabi amafaranga ya Leta. Nourredin Bongo Valentin afunzwe kuva haba ihirikwa ry’ubutegetsi, aregwa ruswa.
