Umugaba Mukuru w’ingabo z’u Rwanda, Lieutenant General Mubarakh Muganga kuri uyu wa 29 Ukwakira 2023 ari i Beijing mu Bushinwa.
Lt Gen. Muganga yitabiriye inama ngarukamwaka ya dipolomasi y’igisirikare cy’u Bushinwa, Beijing Xiangshan Forum, ibaye ku nshuro ya 10.
Minisiteri y’ingabo z’u Rwanda yatangaje ko Lt Gen. Muganga yaganiriye n’umuyobozi mu ngabo z’u Bushinwa ushinzwe ibikorwa bya gisirikare n’igenamigambi, General Liu Zhenli, baganira ku mikoranire y’ingabo z’ibihugu byombi.
Yagize iti: “Uyu munsi Umugaba Mukuru wa RDF, Lt Gen. MK Mubarakh yakiriwe ku kigo cy’inama mpuzamahanga i Beijing na Gen Liu Zhenli, Umuyobozi w’ishami rihuriweho rya komisiyo nkuru y’igisirikare y’ishyaka rya Communist ry’u Bushinwa. Baganiriye ku gukomeza ubufatanye busanzweho.”
Ikigamijwe muri iyi nama nk’uko ibiro ntaramakuru Reuters by’Abongereza byabitangaje ni ukwimakaza gahunda ya Perezida w’u Bushinwa, Xi Jinping, yo guharanira ko Isi igira amahoro no kwiyegereza ibihugu biri mu nzira y’iterambere.
