Sunak arateganya guhatira abadepite gutora itegeko rishya ryo kohereza abimukira mu Rwanda

Ibiro bya Minisitiri w’Intebe w’u Bwongereza birateganya guhatira inteko ishinga amategeko guterana mu biruhuko bya Noheli hagamijwe kwihutisha itegeko “ryihutirwa” rigamije kohereza abasaba ubuhungiro mu Rwanda.

Ku wa Gatatu, gahunda ya Rishi Sunak yongeye guhura n’imbogamizi ubwo Urukiko rw’Ikirenga rwemezaga ko kohereza abasaba ubuhungiro mu Bwongereza binjiye mu gihugu mu buryo bunyuranyije n’amategeko itemewe.

Mu gusubiza Minisitiri w’Intebe yatangaje ko hazashyirwaho “itegeko ryihutirwa” kugira ngo agerageze gutabara iyi politiki ye.

Mu kindi gitero gikaze cyagabwe kuri Sunak, Suella Braverman, ubu usigaranye umwanya w’umudepite nyuma yo kuvanwa ku mwanya wa minisitiri ushinzwe ibibazo by’imbere mu gihugu, ku wa Gatanu yavuze ko itegeko rishya ryose rigomba gutorwa vuba bishoboka.

Mu kiganiro na The Daily Telegraph yagize ati: “Ibi bigomba gufatwa nk’ibyihutirwa. Uyu mushinga w’itegeko ugomba gutangizwa mu kiruhuko cya Noheli kandi inteko ishinga amategeko yahamagariwe kwicara no kurijyaho impaka mu gihe cy’ibiruhuko. ”

Abajijwe niba Minisitiri w’Intebe azahagarika ibiruhuko bya Noheri ku badepite hagamijwe kwihutisha itegeko, Umuvugizi wa Minisitiri w’Intebe yavuze ko “atajya mu bihuha ku bijyanye n’ingengabihe y’inteko ishinga amategeko”.

Ariko yongeyeho ati: “Twiteguye gukora ibikenewe byose.”

Mu gitondo cyo kuri uyu wa Gatanu ushize aganira n’abanyamakuru, Sunak yagize ati: “Tugomba kubona gahunda y’u Rwanda ikora”.

Ati: “Nzakora ibishoboka byose kugira ngo ibyo bishoboke. Abantu barambiwe uyu muzenguruko. Ndashaka kubirangiza – kwihangana kwanjye kwambaye ubusa, nk’abandi bose. ”

Abadepite bagomba kujya mu kiruhuko cya Noheli ku itariki ya 19 Ukuboza bakazagaruka ku ya 8 Mutarama 2024.

Sunak afite ububasha bwo gusaba ko inteko ishinga amategeko yahamagazwa mu gihe icyo ari cyo cyose cy’ibiruhuko.

Urukiko rw’Ikirenga rwavuze ko gahunda ya guverinoma yo kohereza abimukira muri Afurika itemewe n’amategeko rugaragaza ko hari impungenge ko aba bageze mu Rwanda bashobora gusubizwa mu bihugu bahunze.

Itegeko rishya rya Sunak rizashaka gutangaza u Rwanda nk’igihugu gifite umutekano mu rwego rwo gutsinda imbogamizi z’urukiko.

Kandi amasezerano mashya ajyanye no kubahiriza amategeko nayo agomba gushyirwa ahagaragara, aho u Rwanda ruzasezeranya kutazasubiza abantu mu bihugu byabo.