Igisirikare cya Koreya y’Epfo kiravuga ko cyohereje indege z’intambara mu rwego rwo gusubiza indege za gisirikare z’u Bushinwa n’u Burusiya zanyuraga mu kirere cyayo cy’ubwirinzi itabimenyeshejwe.
Indege enye z’u Burusiya n’ebyiri z’u Bushinwa zambutse zinjira muri kirere cy’ubwirinzi cya Koreya y’Epfo kizwi mu Cyongereza nka Korea Air Defense Identification Zone (KADIZ) hejuru y’Inyanja y’u Buyapani, izwi na none nk’Inyanja y’Iburasirazuba (East Sea), hagati ya saa 11:53 z’igitondo (02:53 GMT) na saa 12:10 pm (03:10 GMT) kuri uyu wa Kane hanyuma ziragenda, nk’uko abayobozi bakuru b’Ingabo za Koreya y’Epfo (JCS) babitangaje.
Igisirikare cyavuze ko indege zitigeze zirenga ngo zinjire mu kirere cy’igihugu nk’uko iyi nkuru dukesha Al Jazeera ikomeza ivuga.
Umuryango mpuzamahanga w’indege za gisivili uvuga ko ubusanzwe ADIZ ari agace ibihugu bishobora gusaba ku buryo bumwe ko indege z’amahanga zifata ingamba zidasanzwe zo kwimenyekanisha.
Aha hatandukanye n’ikirere cy’igihugu, ubusanzwe bivuze umwanya uri hejuru y’ubutaka bwacyo, ukagera ku bilometero 12 uvuye ku nkombe zacyo.
Abayobozi bakuru b’Ingabo za Koreya y’Epfo bavuze ko babonye indege z’amahanga mbere y’uko zinjira mu kirere cyabo cy’ubwirinzi, bahagurutsa indege zirwanira mu kirere kugira ngo zifate ingamba.
Ibiro ntaramakuru Yonhap byo muri Koreya y’Epfo bivuga ko umukozi muri minisiteri y’ingabo yavuze ko Koreya y’Epfo yihangirije u Bushinwa ku rujya n’uruza rw’indege zabwo, ariko iki kibazo batigeze bakivuganaho n’u Burusiya.
