Abayobozi ba gereza yo mu karere ka Yamal-Nenets bavuze ko umugabo utavuga rumwe n’ubutegetsi bw’u Burusiya, Alexei Navalny, yapfiriye muri iyi gereza kuri uyu wa Gatanu.
Serivisi ishinzwe amagereza yavuze ko Navalny yumvise amerewe nabi arimo kugenda arambura amaguru kuri uyu wa Gatanu maze atakaza ubwenge yitura hasi. Nubwo imbagukiragutabara yahageze kandi hagakorwa ibishoboka byose ngo atabarwe, yapfuye.
Impamvu y’urupfu rwe ntiramenyekana, nk’uko byatangajwe n’urwego rwa gereza.
Umuvugizi wa Navalny, Kira Yarmysh, yatangaje ko nta cyemeza urupfu rwa Navalny muri gereza yo mu mujyi wa Kharp arabona nk’uko iyi nkuru dukesha Deutsche Welle ikomeza ivuga.
Ati: “Umwunganizi wa Alexei ubu ari kwerekeza i Kharp. Nitumara kugira amakuru tubona, turabitangazaa”.
Alexei Navalny yari muntu ki?
Uyu mugabo w’imyaka 47 y’amavuko yamenyekanye cyane igihe yamaganaga ku mugaragaro ruswa iri mu buyobozi bwo hejuru bw’u Burusiya. Niwe washinze foundation yo kurwanya ruswa bita FBK, kandi yari umwe mu bayobozi b’imyigaragambyo yo kwamagana leta mu mwaka wa 2011-2013, bimuviramo kwiyamamariza kuba umuyobozi wa Moscou mu 2013. Yise Perezida w’u Burusiya, Vladimir Putin, “umusazi” kandi yavuze ko ishyaka riri ku butegetsi mu Burusiya ryuzuyemo “abigoryi n’abajura.”
Mu myaka yashize, Navalny yagiye ahura n’ihohoterwa, gutabwa muri yombi inshuro nyinshi, gukorwaho iperereza ridashira, ndetse n’imanza z’inshinjabyaha, avuga ko zabaga zihishwe inyuma n’impamvu za politiki.
Yarokotse urupfu muri 2020 ubwo yahabwaga uburozi bwa Novichok. Nyuma yo kurogwa na Novichok, abayobozi b’u Burusiya bemeye ko ajya kwivuriza mu Budage aza no kongera gukanguka nyuma yo gukurikiranwa mu bitaro bya Charite i Berlin. Icyakora, kubera ko Navalny yagumye mu Budage amezi menshi nyuma yo kuva mu bitaro, abategetsi b’u Burusiya bavuze ko yarengeje igihe yagombaga kuhamara hakurikijwe urubanza rwaciwe n’urukiko mbere kandi buvuga ko azafatwa nagaruka.
N’ubwo yari yaburiwe, Navalny yahisemo gusubira i Moscou muri Mutarama 2021. Abategetsi b’u Burusiya bamufatiye ku kibuga cy’indege, kandi kuva icyo gihe uyu munyapolitiki yari afunzwe. Mu gihe yakoraga igihano kubera kurenga ku mabwiriza yo gufungurwa by’agateganyo yaje gukatirwa imyaka icyenda kubera kunyereza umutungo no gusuzugura urukiko. Undi mwanzuro w’urukiko muri Kanama uyu mwaka waje wongera igifungo cye kugeza ku myaka 19 kubera ibirego by’inyongera birimo ubuhezanguni.
