Banki ya Afurika y’Epfo yatangaje ko ihagaritse igice konti z’uwahoze ari perezida, Jacob Zuma, amezi abiri mbere y’amatora rusange aho yari yizeye kongera gutangiza umwuga we wa politiki.
Banki ya Mbere y’Igihugu (FNB) yavuze ko urukiko rwategetse iki cyemezo kubera ikibazo kijyanye n’amafaranga yakoreshejwe n’uyu mugabo w’imyaka 81 mu gusana inzu ye bwite no gushyiraho pisine igihe yari perezida.
“FNB yategetswe n’Urukiko Rukuru guhagarika amafaranga asohoka kuri konti z’uwahoze ari Perezida Zuma. Konti ntizifunze kuko kwishyura yinjira nta ngaruka byagizweho.”
Guhagarika konti igice birashoboka ko bizakomeza guhungabanya izina rya Zuma ushinjwa ruswa, kuri ubu winjiye mu ruhande rw’abatavuga rumwe n’ubutegetsi akaba ashaka kugabana amajwi n’ishyaka yarerewemo rya ANC.
‘ANC inyuma y’ibi byose’
Ishyaka rishya rya Zuma, uMkhonto We Sizwe (MK) bivuze Icumu ry’igihugu, ryarakaye cyane, rivuga ko iki cyemezo cyatewe n’impamvu za politiki.
Umuvugizi wa MK, Nhlamulo Ndhlela, yatangarije AFP ati: “Biragaragara ko ishyaka rya ANC riri inyuma y’ibi byose.” Yongeyeho ko ishyaka riri ku butegetsi ryagerageje “gutesha agaciro” uwahoze ari umuyobozi.
FNB yavuze ko icyemezo cy’urukiko cyatanzwe mu mpera za Gashyantare, cyaturutse ku rubanza rwatangijwe n’abashinzwe iseswa ry’indi banki, ifitiwe imyenda na Zuma.
Gukoresha nabi umutungo
Aya makimbirane afitanye isano n’ibara ryavuzwe kuri Zuma mu myaka hafi 10 ishize ku ikoreshwa nabi ry’umutungo wa leta mu gusana inzu ye bwite iri mu ntara avukamo ya KwaZulu-Natal.
Mu mwaka wa 2016, urukiko rukuru rwasanze perezida w’icyo gihe yarakoze ibinyuranyije n’itegeko nshinga akoresha amamiliyoni y’amadolari y’abasoreshwa mu “kuzamura umutekano” ku rugo rwe, rwarimo ikiraro cy’inkoko, pisine na amphitheater.
Ategetswe kwishyura igice cy’amafaranga, Zuma yafashe inguzanyo ya miliyoni 7.8 y’ama-Rand ($ 413,000) muri VBS.
