Abasirikare bagera mu 10 bo ku rwego rwa ofisiye mu Gisirikare cya Repubulika ya Demokarasi ya Congo, FARDC, barimo Gen. Chiko Tshitambwe, bahamagajwe i Kinshasa mu murwa mukuru ngo batange ibisobanuro ku ifatwa ry’umujyi wa Rwindi uherutse kwigarurirwa n’inyeshyamba za M23.
Ubutumwa bwa telegram bwavuye ku Mugaba Mukuru wa FARDC buvuga ko bahamagajwe byihutirwa mu rwego rw’iperereza ku ifatwa rya Rwindi. Nk’uko inyandiko z’ibanga urubuga Kivu Morning Post rwabashije kubona kuri uyu wa Kane, itariki 21 Werurwe, zibigaragaza, ngo abayobozi bakuru ba FARDC ngo barashaka ko aba ba ofisiye baha amakuru y’ingenzi komisiyo ishinzwe iperereza.
Mugomba kujya i Kinshasa guha amakuru y’ingenzi komisiyo ishinzwe iperereza,” ibi ni ibikubiye muri telegram yohererejwe ubuyobozi butandukanye bw’ingabo na guverinoma.
Major Gen. Chiko Tshitambwe Jerome ni umwe mu bavugwaho guhamagazwa n’abandi ba ofisiye, ngo batange ibisobanuro birambuye ku byabaye.
Kwihutirwa kw’iperereza byaciweho akarongo, aho ubutumwa busaba abahamagajwe kwihutira gushyira mu bikorwa amabwiriza yatanzwe.
Ibikubiye muri iyi telegram ngo byongeye kuzamura kwibaza byinshi ku ifatwa rya Rwindi ndetse n’agaciro kahawe iri perereza n’ubuyobozi bw’igisirikare cya Congo.
