Kuri uyu wa Mbere, itariki 25 Werurwe , Urukiko Rukuru rwa Gisirikare i Goma muri Kivu y’Amajyaruguru rwatangiye iperereza ku rubanza rwa kabiri ku bijyanye no kunyereza amafaranga yari agenewe guhemba abasirikare no kugerageza guha ruswa komisiyo y’ubugenzuzi bukuru bw’imari (IGF) kw’abasirikare babiri bakuru babarizwa mu Karere ka 34 ka gisirikare.
Aba basirikare bakuru bombi bagaragara muri uru rubanza ni ba Lt. Col. Gabriel Kasongo, ushinzwe ibiro by’imishahara y’izabukuru, na Jerry Ngoy Katengo, ushinzwe ibiro by’imishahara.
Mu iburanisha ryo kuri uyu wa Mbere, Urukiko Rukuru rwibanze ku kiswe “AUTRES REGIONS”, kimwe mu bice biboneka mu madosiye no ku nyandiko z’imari z’umukozi ushinzwe imishahara mu Karere ka 34 ka gisirikare.
Mu bibazo byabajijwe abaregwa, Urukiko Rukuru kimwe n’urwego rw’ubushinjacyaha bifuzaga uko byagenda kose gusobanukirwa ishingiro ry’iki gice nk’uko iyi nkuru dukesha Radio Okapi ivuga.
Iki gice ntikibaho mu tundi turere twa gisirikare. Cyashyizweho n’abagitangije kugira ngo basobanure ikoreshwa ry’ayo mafaranga yanyerejwe nk’uko umushinjacyaha abitangaza.
Mu kwiregura kwe, ushinjwa Ngoy Katengo yavuze ko yasanze iki gice gikoreshwa mu Karere ka 34 ka gisirikare.
Ku bwe, iki gice giteye ikibazo kirimo abasirikare boherejwe hanze y’Akarere ka 34 ka gisirikare.
Muri iri perereza, Urukiko Rukuru rwagaragaje kandi ibintu bidasanzwe byagaragaye ku rutonde rw’imishahara, aho imikono y’abagenerwabikorwa ijya gusa neza (bisobanuye ko yaba yarashyizweho n’umuntu umwe).
