Minisitiri w’Ububanyi n’Amahanga wa Repubulika Iharanira Demokarasi ya Kongo, Thérèse Kayikwamba Wagner, hamwe na mugenzi we w’Uburusiya , Sergey Lavrov, basinyanye amasezerano y’ubufatanye ku wa Gatandatu tariki ya 9 Ugushyingo 2024, mu rwego rwa gisirikare, ubuhinzi, ingufu, ibikorwaremezo n’ubuhahirane.
Iyi gahunda yo gusinya aya masezerano yabereye muri kaminuza y’ubumenyi n’ikoranabuhanga ya Sirius mu gihugu cy’Uburusiya, ahakorerwa Inama y’ubufatanye hagati ya federasiyo y’Uburusiya na Afurika.
Iyi gahunda yashyizweho mu mwaka wa 2019 hagamijwe guha impande zombi uburyo bwo kugirana ibiganiro bihamye ku bufatanye bwabo.
Umuyobozi w’ububanyi n’amahanga wa Kongo kandi yashimiye Uburusiya ku nkunga ikomeje gutanga mu bibazo bikomeye byo mu burasirazuba bwa RDC.
Thérèse Kayikwamba Wagner yakomeje agira ati:”Repubulika Iharanira Demokarasi ya Kongo irashimara cyane ubufatanye bukomeje kugaragara, harimo n’ubuhagarariye mu nzego mpuzamahanga. Mu Kanama k’Umutekano ka Loni, igihugu cyanyu gifite uruhare rukomeye ku bibazo byihariye byo mu burasirazuba bwa Repubulika Iharanira Demokarasi ya Kongo. Dufite ishimwe rikomeye ku bufasha bwose dukesha Uburusiya, twizeye ko buzahoraho.”
Yongeye gushimangira ubushake bwa RDC bwo gukomeza kongera ibyo bamaze kugeraho mu bufatanye n’igihugu cy’Uburusiya mu nzego zitandukanye z’ubufatanye.
“Mu mwaka wa 2025, tuzaba dufite umwaka udasanzwe ku bihugu byombi. Umwaka tuzizihizamo isabukuru y’imyaka 65 y’ubwigenge bwa Repubulika Iharanira Demokarasi ya Kongo, ariko kandi n’isabukuru y’imyaka 65 y’umubano wacu. Kaminuza y’Ubufatanye ya Patrice Emery Lumumba izaba ikora mu rwego rw’uwo mwaka w’amateka,”.
