Kuri iki Cyumweru, itariki ya 28 Kanama, Inteko yo ku rwego rwo hejuru y’abacamanza batanu b’abanyamahanga bageze muri Kenya mu rwego rwo gukurikirana imikirize y’urubanza ku kirego cyatanzwe na Raila Odinga cyamagana ibyavuye mu matora y’umukuru w’igihugu yo kuwa 09 Kanama mu Rukiko rw’Ikirenga.
Abahanga mu mategeko ni Abagize ihuriro ry’abacamanza b’Abanyafurika (AJJF). Itangazo rigenewe abanyamakuru ryo kuri uyu wa Mbere, itariki 29 Kanama ryemeje ko bageze i Nairobi.
Iri tangazo ryagize riti: “Abahanga mu mategeko bazitabira iburanisha ryose ry’Urukiko rw’Ikirenga, bakurikirane ikirego ku matora ya perezida hashingiwe ku mahame mpuzamahanga y’uburenganzira bwa muntu mu rubanza ruboneye.”
Ihuriro ry’abacamanza b’Abanyafurika (AJJF) ni ihuriro ry’Abanyafurika b’abacamanza n’abahanga mu mategeko biyemeje guteza imbere ubutabera n’iterambere muri Afurika nk’uko iyi nkuru dukesha kenyans.co.ke ivuga.
Icyicaro cyaryo kiri muri Afurika y’Epfo. Ihuriro ritanga ubumenyi mu by’amategeko kuri guverinoma, imiryango itegamiye kuri Leta, ibigo bitera inkunga, abikorera, n’imiryango itegamiye kuri Leta.
Inshingano yo gukurikirana iburanisha ku byavuye mu matora ya Kenya mu 2022 ziyobowe n’uwahoze ai Perezida w’Urukiko rw’Ikirenga muri Tanzania, Mohammed Chande Othman.
Abandi bagize izo ntumwa barimo umucamanza Lillian Tibatemwa-Ekirikubinza wo mu Rukiko rw’Ikirenga rwa Uganda, Ivy Kamanga wo mu Rukiko rw’Ubujurire rwa Malawi, umucamanza Moses Chinhengo wo mu Rukiko rw’Ubujurire, Lesotho, n’umucamanza Henry Boissie Mbha, Perezida w’Urukiko rw’Amatora muri Afurika y’Epfo.
