Abakinnyi ba Manchester United baretse gahunda y’ikipe yo kwambara amakoti yakozwe na Adidas mu rwego rwo gushyigikira umuryango wa LGBTQ+ w’abatinganyi mbere y’umukino wa Premier League wahuje United na Everton ku Cyumweru. Ibyo byaje nyuma y’uko myugariro Noussair Mazraoui yanze kwifatanya n’iyi gahunda, avuga ko bitajyanye n’imyemerere ye y’idini ya Islam.
Mu myaka ibiri ishize, mu gihe cy’ubukangurambaga bwa Rainbow Laces, aho amakipe ya Premier League asabwa gushyigikira umuryango LGBTQ+, abakinnyi ba United bambaye imyenda irimo ibara ry’umukororombya (rainbow) mu gihe cyo kwishyushya mbere y’umukino no kwambara amakoti agaragaza iyi gahunda ubwo binjiraga mu kibuga.
Kuri iyi nshuro, United yari yateganyije ko bazambara ayo makoti ubwo bari kwinjira mu kibuga. Ariko, Mazraoui, umukinnyi mpuzamahanga ukomoka muri Maroc, waguze miliyoni ?15 avuye muri Bayern Munich, yabwiye bagenzi be ko adashobora kwambara iyi myenda kubera imyemerere ye y’idini. Nyuma y’ibi, ikipe yose yafashe umwanzuro ko nta mukinnyi n’umwe uzambara iyo myenda kugira ngo Mazraoui atagaragara wenyine nk’utifatanije n’abandi. Iki cyemezo cyafashwe mu masaha make mbere y’umukino.
Gusa, amakuru agaragaza ko atari buri mukinnyi wanyuzwe n’uyu mwanzuro.
Mu myaka ishize, Manchester United yateye intambwe ikomeye mu kugerageza gukora ibidukikije byakira neza abafana n’abakozi b’umuryango LGBTQ+. Itsinda ry’abafana bita Rainbow Devils ryashinzwe mu 2019, kandi muri iki gihe cy’ubukangurambaga bwa Rainbow Laces, United yashyizeho amashusho ku urubuga rwayo aho abakinnyi nka Jonny Evans na Harry Maguire baganiriye n’abafana bo mu itsinda rya Rainbow Devils ku byerekeye gahunda y’ikipe yo kwimakaza umuco w’ubwuzuzanye.
Bruno Fernandes, kapiteni wa United, yavuze ko abafana bose bumva bashyigikiwe kandi bubashywe. Fernandes yerekanye ko kwambara igitambaro cy’abakapiteni kagaragaza ibara ry’umukororombya ari “ikimenyetso cyo kubaha” no kwerekana ko abafana ba LGBTQ+ bashyigikiwe n’abakinnyi.
United yakoranye na Adidas, umuterankunga wabo mukuru, mu gukora ayo makoti yari kwambarwa ubwo bakinaga na Everton. Iyi mikoranire igera kuri miliyoni ?900 mu gihe cy’imyaka 10. Amakuru yizewe avuga ko Adidas itishimiye uyu mwanzuro nyuma y’uko abakinnyi ba United bari barigeze gushyigikira iyi gahunda mu myaka ishize.
Manchester United yatanze itangazo rigira riti: “Manchester United yakira abafana baturutse mu miryango yose, harimo n’abagize umuryango wa LGBTQ+, kandi tuzwiho gushyigikira amahame y’ubwuzuzanye n’uburinganire. Abakinnyi bafite uburenganzira bwo kugira ibitekerezo byabo bwite, cyane cyane bijyanye n’imyemerere yabo y’idini, n’ubwo bishobora kutajyana n’umwanya w’ikipe mu bihe bimwe na bimwe.”
Itsinda rya Rainbow Devils naryo ryasohoye itangazo rigira riti: “Twubaha uburenganzira bw’uyu mukinnyi bwo kugira ibitekerezo bye bwite, ariko kandi tubabajwe n’uko yashyize ikipe mu mwanya ugoye aho bumvaga ko batagombaga kwambara aya makoti. Dufite impungenge z’uko ibi bishobora kugira ingaruka mbi ku bakinnyi bashobora kuba bafite ibibazo bijyanye n’imyitwarire yabo ku giti cyabo.”
Mazraoui ntiyari ahuye n’iki kibazo bwa mbere. Muri Gicurasi 2023, abafana ba Bayern Munich bari bafite icyapa kivuga ngo: “Amabara yose ni meza. I Toulouse, i Munich, hose. Wubahe indangagaciro zacu, Mazraoui!”
Ibi byakurikiye amagambo yari yatanze kuri Instagram ashyigikira mugenzi we Zakaria Aboukhlal w’ikipe ya Toulouse, wanze kwitabira ubukangurambaga bwa Ligue 1 bwo gushyigikira umuryango LGBTQ+.
