Abakinnyi b’ikipe ya Rayon Sports Women Football Club batangiye gusohorwa mu mazu bacumbitsemo kubera kudahembwa amezi atatu yikurikiranya.
Aba bakinnyi bavuga ko batarahabwa imishahara ya Gashyantare, Werurwe na Mata 2025, ndetse n’uduhimbazamusyi tw’imikino 8 mu 14 bari baberewemo. Bavuga ko nubwo mbere y’umukino wa nyuma w’Igikombe cy’Amahoro bijejwe guhabwa uduhimbazamusyi icyenda, bahawe dutatu gusa.
Bamwe mu bakinnyi b’abanyamahanga batangiye no kubura ibiribwa, nyuma yo kwirukanwa mu nzu kubera kutishyura. Abakinnyi bavuga ko bamaze igihe baganira n’ubuyobozi ariko bukarangwa no kwita ku ikipe y’abagabo kurusha iyabo.
Mu ibaruwa bandikiye ubuyobozi, basabye kwishyurwa ku neza, bitaba ibyo bakitabaza inzego zibishinzwe. Bagaragaje agahinda batewe no kuba baritanze uko bashoboye bagatwara ibikombe ariko ntibahabwe agaciro.
Amakuru avuga ko inkunga iyi kipe igenerwa icishwa kuri konti y’Umuryango wa Rayon Sports, bikekwa ko ishobora gushyirwa mu bindi bikorwa.
Ibi bibaye mu gihe Rayon Sports WFC yegukanye igikombe cya shampiyona ya 2024-2025, nubwo abakinnyi bayo bahangayikishijwe n’ubuzima bwo hanze y’ikibuga.
