Abakuru b’ibihugu byo muri Afurika ni bamwe mu bahembwa agatubutse ku Isi nubwo umugabane wabo wugarijwe n’ibibazo byinshi bitandukanye.
Perezida Jacob Zuma wa Afurika y’Epfo, niwe wa mbere uhembwa amafaranga menshi ku mugabane n’amadolari 272,000, akaba aza ku mwanya wa kane ku Isi mu bakuru b’ibihugu bahembwa menshi. Perezida Paul Kagame aza ku mwanya wa 10 n’amadorali 85,000.
[xyz-ihs snippet=”google-pub”]
Dore abakuru b’ibihugu byo muri Afurika 10 bahembwa menshi ku mwaka kurusha abandi nk’uko byemezwa na African Rankings.com
1.Jabob Zuma (Afurika y’Epfo) – 272,000$
Jacob Zuma ni perezida wa Afurika y’Epfo kuva mu 2009, akaba aza mu bakuru b’ibihugu 10 ba mbere bahembwa agatubutse ku Isi yose, aho aza ku mwanya wa kane. Yongeye gutorerwa kuyobora iki gihugu mu 2014, kuri ubu akaba ari we mukuru w’igihugu muri Afurika uhembwa menshi kurusha abandi.
2.Abdelaziz Boutefrika (Algeria) – 168,000$
Abdelaziz Boutefrika ni umunyapolitiki w’Umunya-Algeria wavukiye mu gihugu cya Maroc aza kuba perezida wa Algeria mu 1999. Kuri ubu niwe murkuru w’igihugu wa 2 muri Afurika uhembwa menshi.
3.Uhuru Kenyatta (Kenya) – 132,000$
Uhuru Kenyatta ni perezida wa 4 wa Kenya akaba ayoboye kuva mu 2013. Ni umuhungu wa Jomo Kenyatta wabaye perezida wa mbere wa Kenya. Kuri ubu, niwe mukuru w’igihugu wa 3 muri Afurika uhembwa menshi kurusha abandi. Mu 2014, yagize atya agabanya umushahara we uva ku 14,000$ ku kwezi, awushyira ku 11,000$.
4.Azali Assoumani (Comoros) – 115,000$
Azali Assoumani ni perezida wa kimwe mu bihugu bito ku mugabane wa Afurika kuva mu 2016. Ku myaka ye 57, Assoumani yabanje kuba perezida w’iki gihugu mu 1999 nyuma yo guhirika ku butegetsi perezida Tadjidine Ben Said Massounde.
5.Hage Geingoba (Namibia) – 110,000$
Hage Geingoba ari ku butegetsi kuva kuwa 21 Werurwe 2015, akaba ari perezida wa gatatu wa Namibia. Yabonye impamyabumenyi y’ikirenga (PhD) mu 2014 yakuye muri Kaminuza ya Leeds mu Bwongereza. Kuri ubu niwe mukuru w’igihugu wa 5 uhembwa agatubutse muri Afurika.
6.Denis Sassou Nguesso (Congo) – 110,000$
Perezida Denis Nguesso wa Repubulika ya Congo aza ku mwanya wa 6 w’abaperezida bahembwa menshi kurusha abandi muri Afurika. Yabaye perezida w’iki gihugu kuva mu 1997; nyuma y’uko yari yarabanje kukiyobora kuva mu 1979 kugeza mu 1992. Ni umusirikare wabyigiye muri Algeria no mu Bufaransa mbere yo kugaruka mu gihugu cye akinjira mu mutwe kabuhariwe w’Abaparakomando.
7.Ali Zeidan (Libya) – 105,000$
Uyu wahoze ari Minisitiri w’Intebe wa Libya, yaje kugenwa n’Inama Nkuru y’Igihugu nka perezida kuwa 14 Ukwakira 2012, atangira kuyobora kuwa 14 Ugushyingo nyuma y’aho kongere imwemereje. Zeidan yaje kwirukanwa na komite y’Inteko nshinga amategeko, maze kuwa 14 Werurwe 2014 ahunga Libya. Uyu rero akaba yarazaga ku mwanya wa 7 w’abayobozi bo muri Afurika bahembwa agatubutse.
8.Alassane Dramane Ouattara (Côte d’Ivoire) – 100,000$
Perezida Ouattara uzwiho kuba ari umukozi cyane, gukorera mu mucyo no kugira imiyoborere myiza, ni umuhanga mu by’ubukungu. Niwe perezida wa gatanu w’iki gihugu, akaba ari ku butegetsi kuva mu 2011.
9.Ellen Johnson Sirleaf (Liberia) – 90,000$
Ellen Johnson ni umunyapolitikikazi wo muri Liberia, akaba ari perezida wa 24 w’iki gihugu kuva mu 2006. Uyu niwe mugore wa mbere watorewe kuyobora igihugu muri Afurika akaba umukuru w’igihugu wa 9 kuri uyu mugabane uhembwa agatubutse kurusha abandi.
10.Paul Kagame (Rwanda) — 85,000$
Paul Kagame, ni perezida wa 6 w’u Rwanda akaba ari ku butegetsi kuva mu 2000, nyuma yo kwegura kw’uwari perezida, Pasteur Bizimungu. Kuri uru rutonde rw’abakuru b’ibihugu bahembwa agatubutse kurusha abandi muri Afurika, Kagame aza ku mwanya wa 10.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
