Abandura indwara y’icyorezo ya Coronavirus (Covid-19) ku Isi bakomeje kwiyongera bikabije, kuri uyu wa 27 Mata 2020 bakaba bamaze kurenga miliyoni eshatu.
Iyi mibare yazamuwe cyane n’ibihugu nka Leta Zunze Ubumwe z’Amerika kuva mu mpera za Werurwe 2020, ubu zikaba zimaze kugaragaramo abanduye Covid-19 barenga miliyoni imwe uyu munsi.
Hagiye hagaragara imibare iri hejuru y’abanduye iki cyorezo mu bihugu nk’Esipanye kimaze kurenza 229,400, u Butaliyani bwarengeje 199,400 n’u Bufaransa bwarengeje 165,800 gusa byo muri iki gihe imibare yagiye imanuka.
Ibindi bihugu bikurikiyeho mu kugira abanduye benshi ni u Budage (158,389), u Bwongereza (157,149), Turukiya (112,261), Irani (91,472), u Burusiya (87,147) n’u Bushinwa (82,830).
Ubwiyongere bw’abandura bujyana ahanini n’abicwa n’iki cyorezo, ubu bamaze kugera mu 211,035 ku Isi yose. Amerika iza ku mwanya wa mbere mu kugira abishwe na Covid-19 benshi (56,498), u Butaliyani ku mwanya wa kabiri (26,977), Esipanye ku mwanya wa gatatu (23,521), u Bufaransa ku mwanya wa kane (23,293) n’u Bwongereza ku mwanya wa gatanu (21,092).
Tariki ya 24 Mata 2020 yagaragayemo imfu nyinshi kurusha mu bindi bihe byabayeho, ubwo muri Amerika hapfaga abarenga 3000 ku munsi umwe. Iki gihugu cyari kimaze igihe gipfusha ababarirwa mu 2000.
Hari ukugabanyuka kw’imibare y’abicwa na Covid-19 kandi mu bihugu nk’u Butaliyani n’u Bufaransa byigeze gupfusha abarenze 1000 ku munsi umwe, ubu imibare ikaba iri hagati ya 200 na 400.
Abamaze gukira muri rusange barenga 919,300 barimo abo muri Amerika barenga 137,900 bakize, Esipanye ni abarenga 120,800 n’u Budage barenga 114,500.
Umurwayi wa mbere yagaragaye mu mugi wa Wuhan mu Bushinwa mu mpera za 2019. Iyi ndwara yazahaje cyane uyu mugi ndetse n’iki gihugu muri rusange ariko gisa n’icyahacitse burundu kuko nta murwayi usigaye muri Wuhan nk’uko byatangajwe n’inzego z’ubuzima. N’ubwo kizahaje ibindi bihugu, biratanga icyizere ko cyaranduka mu gihe hafashwe ingamba zijyanye n’ubukana bwacyo, Isi yose igahuriza hamwe imbaraga mu kukirwanya.
Src: World Ometers, WHO
