Abayobozi muri Burera na Gicumbi bahagurukiye kurwanya ibiyobyabwenge

Mu nteko rusange yahuje abaturage b’uturere twa Gicumbi na Burera yateranye kuwa kabiri tariki ya 22 Ugushyingo, abaturage bayitabiriye basabwe gushyira hamwe imbaraga, bakarwanya ibiyobyabwenge bigaragara mu mirenge yabo byiganjemo Kanyanga, Blue Sky, Chief waragi n’izindi… kuko bihungabanya umutekano.

Iyi nteko yabereye mu kagari ka Remera, umurenge wa Manyagiro mu karere ka Gicumbi, ariko ihuza abaturage b’imirenge ya Manyagiro muri Gicumbi n’ab’umurenge wa Gatebe muri Burera, yari yitabiriwe n’abantu barenga 900, barimo abaturage muri rusange, abayobozi b’imidugudu, abahuzabikorwa b’utugari, ab’imirenge, abahagarariye amadini, abahagarariye abikorera kugiti cyabo ndetse n’inzego z’umutekano.
[ad id=”44145″]

Iyi nteko yayobowe n’umuyobozi w’akarere ka Gicumbi, Juvenal Mudaheranwa ari kumwe n’umuyobozi w’akarere ka Burera, Florence Uwambajimana, bari kumwe n’umuyobozi wa Polisi mu karere ka Burera, Superintendent of Police(SP) Alex Fata n’abahagarariye izindi nzego zishinzwe umutekano muri utu turere.

Ingingo nyamukuru yari iteganyijwe kuganiirwaho, yari ikibazo cy’ikoreshwa ry’ibiyobyabwenge muri aka gace n’uburyo byarwanywa kuko utu turere twombi turangwamo ikigero cyo hejuru mu bucuruzi bwabyo bukorwa n’abitwa “Abarembetsi”; ndetse n’ibindi bihungabanya umutekano muri rusange.

Mudaheranwa mu ijambo rye, yavuze ko muri rusange ibyaha bigenda bigabanuka, abaturage batuye muri iyi mirenge yombi igaragara nk’indiri y’abacuruza ibiyobyabwenge kuberako iri kure y’ubuyobozi bw’uturere twombi, basabwa gushyira hamwe imbaraga bakarwanya abiyita “Abarembetsi” binjiza bakanacuruza ikiyobyabwenge cya Kanyanga ndetse n’ibindi bitemewe, babikuye mu bihugu bahana imbibi.

Yabwiye abari bitabiriye inama ko kurwanya Abarembetsi bazana bakanacuruza kanyanga, biri mu nyungu zabo kandi ari uburyo bufatika bwo kurwanya n’ibindi byaha kuko iza ku isonga mu bihungabanya umutekano mu karere ka Gicumbi na Burera by’umwihariko kandi ariyo nyirabayazana w’ibindi byaha nko gukubita no gukomeretsa, ihohoterwa rishingiye ku gitsina no gufata ku ngufu, ubujura n’ibindi,..

[ad id=”44145″]

Umuyobozi w’akarere ka Burera, Uwambajimana we, yasabye abayobozi b’imidugudu ko kugeza mu mpera z’uyu mwaka, baba barangije gukora urutonde rw’abantu bose banywa bacuruza cyangwa abinjiza kanyanga ku mitwe cyangwa abazitunda bakoresheje za moto bose bagakurikiranwa bagahanwa.

Umuyobozi wa Polisi mu Karere ka Burera,SP Fata, yabwiye abitabiriye iyi nama ko Polisi y’u Rwanda yahagurukiye kurwanya abiyita abarembetsi kandi itazihanganira uzakinisha kurwanya amarondo cyangwa inzego zishinzwe umutekano, aha yaboneyeho kwereka abitabiriye inama, abagabo 6 Polisi yari yafashe nyuma yo gutera urugo rw’umuturage wari wabatanzeho amakuru ku bucuruzi bwa Kanyanga.

SP Fata yasabye abayobozi b’inzego z’ibanze n’abaturage gukomeza gufatanya na Polisi bagatanga amakuru y’aho bazi aba barembetsi, kandi nabo bakirinda kunywa ibiyobyabwenge kuko byangiza ubuzima bikanateza umutekano mucye.
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com