Amagana y’abimukira baturutse muri Eritrea bari mu myigaragambyo bahanganye na Polisi ya Israel bakoresheje intwaro zirimo amabuye n’ibiti.
Nk’uko ikinyamakuru Sky News cyabitangaje, uku guhangana kwabaye kuri uyu wa 2 Nzeri 2023 kwatewe n’uko aba bimukira bashakaga guhagarika ibirori byari bigiye kubera kuri ambasade ya Eritrea muri Tel Aviv.
Aba bimukira berekeje kuri ambasade barakaye, bamenagura ibirahuri by’imodoka basangaga mu nzira ndetse n’iby’inyubako zikorerwamo ubucuruzi. Polisi ya Israel mu kubakumira, yakoresheje ibyuka biryana mu maso ndetse n’amasasu nyayo.
Baganje abapolisi kuko banabateraga amabuye, bakomeza urugendo rwabo, bageze ku cyumba cyari kigiye kuberamo ibi birori batemera, baracyangiza, hanyuma bahagarika imyigaragambyo yabo.
Ubwo hari hakeye, abahagaritse ibi birori bahanganye na bagenzi babo na bo baturutse muri Eritrea, bo bari bashyigikiye ko biba. Byabaye ngombwa ko Polisi yitambika hagati yabo, icyakoze kuri iyo nshuro ntibyayigora nka mu gitondo.
Urwego rwa Israel rushinzwe ubutabazi rwatangaje ko abantu barenga 140 bakomerekeye muri iyi myigaragambyo. Harimo abapolisi 30 n’abimukira 11 barashwe.
