Umuryango w’Ubukungu n’Iterambere ryo mu bihugu bya Afurika y’Amajyepfo (SADC) wongeye gufata icyemezo cyo gukomeza gushyigikira Repubulika Iharanira Demokarasi ya Congo mu bikorwa bigamije kugarura amahoro n’umutekano, kurinda abasivili no gukemura ibibazo by’umutekano bikomeje kuyirangwamo.
Ibi byemerejwe mu nama ya 46 isanzwe y’Abakuru b’Ibihugu na za Guverinoma bigize SADC, yabereye i Durban muri Afurika y’Epfo ku wa 17 Kanama 2026, iyobowe na Perezida Cyril Ramaphosa wa Afurika y’Epfo.
Mu itangazo ryasohowe nyuma y’inama, SADC yongeye kugaragaza ko “yifatanyije n’abaturage ba RDC”, inashimangira ko izakomeza gushyigikira ibikorwa bihuriweho n’ibihugu byo mu karere ndetse n’umuryango mpuzamahanga bigamije kugarura amahoro n’umutekano muri iki gihugu.
Uyu muryango wavuze ko izo mbaraga zigomba no kwibanda ku “kurinda abasivili, kongera ibikorwa by’ubutabazi n’ubuzima rusange, guteza imbere ibiganiro birimo impande zitandukanye no kongera ubushobozi bw’abaturage bwo guhangana n’ibibazo bikomeje kubugariza.”
RDC yari ihagarariwe muri iyi nama na Guy Muadiamvita Kabambo, Minisitiri wungirije w’Intebe akaba na Minisitiri w’Ingabo n’abazihozemo.
Nubwo SADC itatangaje muri uyu mwanzuro igikorwa gishya cya gisirikare cyangwa ingamba zihariye zo gukemura imirwano, kuba yongeye gushyira ku mugaragaro ubufatanye bwayo na RDC bifite uburemere mu gihe ikibazo cy’umutekano mu burasirazuba bw’iki gihugu gikomeje kugira ingaruka ku mutekano w’akarere.
SADC kandi yongeye gushimangira ko gukemura ibibazo by’umutekano muri RDC bigomba kujyana n’imbaraga zo guteza imbere ibiganiro, kurinda abasivili no gushakira akarere amahoro arambye.
Iyi nama yabaye mu gihe Perezida Cyril Ramaphosa yatorewe kuyobora SADC, naho Perezida wa Zambia atorwa nk’uzamusimbura.
Umwami Mswati III wa Eswatini na we yatowe nk’Umuyobozi w’Urwego rwa SADC rushinzwe Politiki, Ingabo n’Umutekano.
Ikibazo cya RDC gikomeje kuba kimwe mu bibazo by’umutekano SADC ishyira imbere, aho uyu muryango ushimangira ko ibisubizo bigomba kuboneka binyuze mu bufatanye bw’ibihugu byo mu karere n’imbaraga mpuzamahanga.
