Minisitiri w’Intebe wa Ethiopia, Abiy Ahmed, yatangaje ko guverinoma ye igiye kujya mu mishyikirano n’ingabo ziharanira ubwigenge bwa Leta ya Tigray.
Nk’uko Reuters ibivuga, PM Abiy yabimenyesheje abagize inteko ishinga amategeko ya Ethiopia kuri uyu wa 14 Kamena 2022.
Umukuru wa guverinoma yasobanuriye abadepite ko yashyizeho itsinda riziga ku buryo ibiganiro bizabaho. Ati: “Ku bijyanye n’amahoro, hashyizweho komite. Imishyikirano isaba akazi kenshi. Komite yashyizweho kandi iziga ku buryo ibiganiro bizakorwa.”
Abiy yavuze ko iyi komite iyobowe na Minisitiri w’Intebe wungirije, Demeke Mekonnen, izamara iminsi iri hagati y’10 na 15 itegura ibiganiro bizaba hagati ya guverinoma n’izi ngabo.
Leta ya Abiy n’ingabo za Tigray ntizicana uwaka guhera mu mpera z’2020 kuko guhera mu Gushyingo k’uwo mwaka, zatangiye kurwana zishinjanya ubushotoranyi, intambara ikwira no mu bindi bice by’igihugu nka Amhara na Afar.
Iyi ntambara yabaye nk’ihagaze guhera muri Werurwe 2022 ubwo Abiy yatangazaga ko ingabo za Leta zifashe icyemezo cyo kuba zihagaritse ibitero ku za Tigray, n’ubwo zakomeje gushinjanya gukandamiza ikiremwamuntu.
