Umuryango Mpuzamahanga wita ku buzima (OMS) watangaje ko mu gitondo cyo kuri uyu wa 24 Gashyantare 2021 Ghana yakiriye inkingo za Covid-19 muri gahunda ya Covax, kikaba ari cyo gihugu cya mbere cya Afurika kizibonye.
Nk’uko OMS ibivuga, Ghana yakiriye inkingo 600,000 muri iki cyiciro cya mbere, ikaba ari intambwe itanga icyizere ko iki cyorezo gishobora kujya ku iherezo nk’uko byemejwe n’uyihagarariye muri Ghana, Francis Kasolo.
Francis Kasolo yagize ati: “Kuza kw’izi nkingo muri Ghana ni amahirwe akomeye yo gushyira ku iherezo iki cyorezo.”
Biteganyijwe ko abahabwa izi nkingo bwa mbere ari abakozi mu nzego z’ubuzima n’abandi bakomeje urugamba rwo kurwanya iki cyorezo; bose bafite ibyago byinshi byo kucyandura.
Covax ni gahunda y’Umuryango w’Abibumbye (UN) yo kugeza inkingo za Covid-19 mu bihugu biri mu nzira y’iterambere cyangwa se ibikennye, aho byitezwe ko muri yo, hazatangwa inkingo miliyoni 330 ku bihugu 145 muri iki cyiciro.
Muri izi nkingo harimo 1,098,960 izizahabwa Leta y’u Rwanda, Minisitiri w’Ubuzima w’iki gihugu, Dr. Ngamije Daniel akaba aherutse gutangaza ko zizagera muri iki gihugu mu mpera z’uku kwezi kwa Gashyantare.
Kurikira ibiganiro n’amavidewo binyura kuri Bwiza TV
