Afurika y’Epfo: Babiri mu bahatanira ikamba rya Nyampinga ni ba Dogiteri

Karishma akora mu bitaro bya Charlotte Maxeke Johannesburg Academic Hospital (CMJAH), aho akomereza gukora anongerera ubumenyi naho Thato ni Dogiteri ku bitaro bikuru bya Klerksdorp Tshepong Hospital.

Asobanura ku ngaruka icyorezo cya coronavirus cyaba cyaragize ku kazi kabo no ku myiteguro y’irushanwa, Karishma yavuze ko ingaruka zitabura kuko byabasabaga gukoresha imbaraga nyinshi. Yagize ati: “Icyorezo cyakomye mu nkokora akazi kacu, si ubwiyongere bw’abarwayi gusa ahubwo ni ubwiyongere bw’umubare w’abaganga basanganywe covid-19, bigatuma bajya mu kiruhuko cyo kwitabwaho abazima tugasigara dukora ahacu n’ahabarwaye”.

Mugenzi we Thato we yavuze ko bibasaba ubutwari no gukomera. Ati: “Tuba dusabwa gukomera cyane n’ubwo uburwayi bukomeza gufata indi ntera. Hari igihe cyageze nkumva ko biturangiriyeho ariko nakwibuka abo twafashije mbere bagakira, bikantera imbaraga zo kunamba ku mwuga wanjye no kwitangira imbaga y’abarwayi”.

Aba bakobwa bavuga ko irushanwa ry’ubwiza no kuvura abantu babibangikanya bigakunda kuko bashyigikiwe n’igihugu, ababyeyi ndetse n’abo bakorana mu kazi. Thato yagize ati: “Nkorana neza na bagenzi banjye. Iyo hari impamvu ivutse ntari niteze ,bagenzi banjye barahambera bakankorera aho ntabonetse. Umuryango wanjye na wo uranshyigikiye kandi Imana ni yo nshyira imbere muri byose”.

Aba banyampinga babajijwe ku nama baha abantu ku kijyanye n’ubuzima, bombi bahurije ku gukora siporo no kunywa amazi menshi ku munsi kuko umubiri w’umuntu ahanini ugizwe n’amazi.

Biteganyijwe ko ibirori byo kwerekana nyampinga wahize abandi muri Afurika y’Epfo bizaba ku wa 24 Ukwakira 2020 ndetse bikazanyura kuri Televiziyo ya M-Net na Mzanzi Magic mu buryo bwa ‘live’.