Afurika y’Epfo mu minsi mike ishize yohereje izindi ngabo ndetse n’ibikoresho bya gisirikare muri Repubulika Iharanira Demokarasi ya Congo, nyuma yo kuhapfushiriza abasirikare 14.
Ni amakuru Ibiro Ntaramakuru Reuters by’Abongereza bivuga ko byahamirijwe n’amasoko ya dipolomasi na Politiki.
Afurika y’Epfo yohereje ingabo z’inyongera, mu gihe hari ubwoba bw’uko intambara ikomeje kubera mu burasirazuba bwa Congo Kinshasa ishobora gufata indi ntera.
Amakuru yerekana ingendo z’indege, yerekana ko hari indege imaze iminsi ikora ingendo hagati ya Afurika y’Epfo na Lubumbashi.
Umwe mu badepite bo Afurika y’Epfo yabwiye Reuters ko i Lubumbashi hamaze kugezwa abasirikare b’iki gihugu bari hagati ya 700 na 800.
Depite Chris Hattingh yagize ati: “Twamenyeshejwe ko hari ingabo ziteraniye i Lubumbashi. Twamenye ko abasirikare bari hagati ya 700 na 800 bari i Lubumbashi.”
Uyu mudepite usanzwe ari umuvugizi w’ihuriro Democratic Alliance rigizwe n’amashyaka ari ku butegetsi, yunzemo ko bigoye kumenya ikirimo kujya mbere kuko Komisiyo ishinzwe Igisirikare mu Nteko Ishinga Amategeko itigeze imenyeshwa ibya ziriya ngabo.
Icyakora Umuvugizi w’igisirikare cya Afurika y’Epfo yemeye ko amakuru y’Ingabo zoherejwe Lubumbashi ayazi, gusa yirinda kugira byinshi ayatangazaho.
Amakuru avuga ko Afurika y’Epfo ifite muri RDC ingabo zibarirwa mu 3,000; zirimo iziri mu butumwa bwa Loni bwo kugarura amahoro (MONUSCO) ndetse n’ubw’umuryango wa SADC (SAMIDRC).
Iki gihugu kiri kongera umubare w’abasirikare gifite muri Congo, mu gihe Leta yacyo imaze iminsi yotswa igitutu isabwa gucyura ingabo ifite mu burasirazuba bwa Congo; kuko Afurika y’Epfo nta nyungu ifite mu ntambara iri kuhabera.
