Abarwanyi b’umutwe w’iterabwoba wa Al Shabab wagabye ibitero biasanzwe ku biturage bibiri byegereye umupaka na Ethiopia, bica abantu 17 barimo abasivili batatu n’abapolisi ba Ethiopia biciwe ku butaka bwa Somalia, mu gihe abarwanyi b’uyu mutwe 63 bishwe nk’uko byatangajwe n’umuyobozi mu nzego z’umutekano za Ethiopia.
Ibi bitero bitari bisanzwe mu bice byegereye umupaka wa Somalia na Ethiopia byabaye kuwa Gatatu ushize mu biturage bya Yeed na Aato, biherereye mu karere ka Bakool nyuma y’aho umwe bayobozi muri Al Shabab yiciwe ku butaka bwa Ethiopia.
Ngo ni ibitero bidakunze kuba kubera ko abashinzwe umutekano muri Ethiopia bakunze kuhaba ku bwinshi ndetse usanga banacungira umutekano imbere muri Somalia, aho bari mu butumwa bw’Ingabo z’Umuryango w’Abibumbye.
Komanda wa Al Shabab yari yambutse umupaka yinjira muri Ethiopia aho yari agiye gushinga umutwe uzajya uhakorera nk’uko byatangajwe n’umuyobozi mu nzego z’umutekano za Ethiopia utifuje ko amazina ye atangazwa kubera ko atemerewe kuvugisha itangazamakuru.
Uyu muyobozi mbere yari atangaje ko hishwe abantu 17 bose b’abapolisi ba Ethiopia, ariko nyuma asobanura ko harimo n’abasivili bishwe.
Yavuze kandi ko mu mirwano polisi ya Ethiopia yafashe imbunda za machine gun n’imodoka abarwanyi ba Al Shabab bari barimo.
Ku ruhande rwayo, Umuvugizi wa Al Shabab, Abdiasis Abu Musab, yavuze ko abarwanyi babo bigaruriye ibyo biturage bibiri kandi bakica abapolisi mirongo ba Ethiopia ndetse bakabambura intwaro.
Musab ariko yanze kugira icyo avuga ku mubare w’abarwanyi ba Al Shabab bishwe.
