Perezida wa Gabon, Ali Bongo ategerejwe mu gihugu kuri uyu wa Kabiri tariki ya 15 Mutarama 2019, nyuma y’amezi arenga abiri yivuriza muri Maroc.
Ali Bongo agiye gusubira mu gihugu nyuma y’icyumweru bamwe mu basirikare be bagerageje kumuhirika ku butegetsi bikabapfubana.
Uyu muyobozi yari amaze igihe yivuza indwara yamufashe igitaraganya ubwo yari ari mu nama muri Arabie Saoudite ku wa 24 Ukwakira 2018, ahava ajyanwa muri Maoc.
Perezida Bongo w’imyaka, yaherukaga kwigaragaza ageza ijambo ku baturage be kuri televiziyo y’igihugu ari muri Maroc, ababwira ko ari mu bihe bigoye.
Mu cyumweru gishize, ubutegetsi bwahagaritse abari bafite umugambi wo guhirika ubutegetsi, bufunga uwari ayoboye icyo gikorwa, abasirikare bandi babiri bari bamuyobotse baricwa.
Abashakaga kumuhirika ku butegetsi, ubwo bari bamaze gufata radiyo y’igihugu, bavuze ko ijambo Bongo yavuze riteye isoni ndetse ko igihugu cya Gabon cyataye umurongo.
Ikinyamakuru AFP, gitangaza ko “Abaganga bemeza ko urugendo agira rudashobora kubangamira ubuzima bwe”.
Ali Bongo ni umuhungu wa Omar Bongo, yabaye umukuru w’igihugu mu 1967, apfa mu 2009, ikivi cye gicumbukurwa n’umuhungu we Ali.
