Madamu Alison Thorpe yagizwe Ambasaderi mushya w’u Bwongereza mu Rwanda asimbuye Omar Daair OBE, uzimurirwa mu yindi ambasade. Thorpe azatangira imirimo ye muri Nzeri 2024 nk’uko byatangajwe na Guverinoma y’u Bwongereza.
Muri Mutarama 2021, nibwo Omar Daair yagizwe Ambasaderi w’u Bwongereza mu Rwanda na Ambasaderi udatuye mu Burundi muri Mutarama 2021, atangira imirimo muri Nyakanga muri uwo mwaka.
Omar yinjiye mu biro bishinzwe Ububanyi n’amahanga, Commonwealth n’Iterambere mu 2002.
Ambasaderi Alison Thorpe ni muntu ki?
Yavukiye muri Lichfield, Staffordshire, mu Bwongereza. Kuva mu 2022 kugeza ubu yari akuriye ishami rishinzwe afurika yo hagati n’iy’amajyepfo n’intumwa y’u Bwongereza mu Biyaga Bigari.
Kuva Mata 2022 kugeza Kanama 2022, yari Umuyobozi ushinzwe amavugurura muri FCDO, mu gihe mbere yahoo muri 2020 kugeza 2022 yari Umuyobozi wungirije ushinzwe umuco muri FCDO.
Kuva 2019 kugeza 2020 yari Umuyobozi wungirije muri FCO ushinzwe Ikigega cyo Guteza Imbere Ubucuruzi na gahunda zo koroshya ubucuruzi.
2018 kugeza 2019, yari Umuyobozi wungirije ushinzwe Afurika muri FCO, mu gihe mbere yahoo 2014 kugeza 2018 yari akuriye ishami rishinzwe ingamba.
Ambasade y’u Bwongereza ya mbere yakozemo n’iyo muri Geneve aho yakoraga kuri reception kuva mu 1997 kugeza mu 1998. Yakoze kandi muri ambasade y’u Bwongereza i Stockholm muri Suede no muri Skopje, muri Macedonia hagati ya 2006 na 2014
