Mu rukerera rwo kuri uyu wa Kabiri, ikipe ya REG BBC yerekeje i Dakar muri Senegal, aho igiye guhagararira u Rwanda mu mikino ya BAL, Sahara Conference, izatangira tariki 11 Werurwe 2023.
REG BBC yagiye iyobowe n’abatoza bayo aribo Dean Murray na Maxime Marrius Mwiseneza ndetse n’abakinnyi 12.
Abakinnyi 12 REG yahagurukanye i Kigali barimo Nshobozwabyosenumukiza Jean Jacques Wilson, Olivier Shyaka, Niyonkuru Pascal, Ntore Habimana, Steven Hagumintwali.
Ndizeye Ndayisaba Dieudonne ‘Gaston’, Prince Muhizi, Umuhoza Jean De Dieu, Adonis Filer Jovon, Pitchou Manga Kambuy, Thomas Cleveland, Graham Delwan, na bo bari mu bagize ikipe ya REG BBC.
Uretse REG BBC izaba ihagarariye u Rwanda muri Conference ya Sahara, harimo na US-Monastir ifite igikombe cya BAL giheruka ubwo yari itsinze Petro de Luanda yo muri Angola imbere y’abafana basaga ibihumbi 10 bari bateraniye muri BK Arena.
Andi makipe ni Kwara Falcons (Nigeria), Abidjan Basket Club (Côte d’Ivoire) AS Douanes (Senegal) ndetse na Stade Malien (Mali).
REG BBC kimwe n’andi makipe 5 biri kumwe muri iri tsinda, zigeze kuri ibi nyuma yo kwegukana ibikombe bya za shampiyona zikinamo imbere mu bihugu byayo.
Abategura iri rushanwa rya BAL bayobowe na President waryo, Amadou Gallo Fall bemeje ko amakipe ane azazamuka muri buri conference azakina imikino ya nyuma na ‘playoffs’ izabera muri BK Arena hagati ya tariki ya 21 na 27 Gicurasi 2023.
Muri rusange, andi makipe 6 yisanze muri ‘Nile Conference’ izakinira kuri Hassan Mostafa Indoor Sports Complex iri i Cairo mu Misiri hagati ya tariki ya 26 Mata n’iya 6 Gicurasi, uyu mwaka.
‘Nile Conference’ izaba irimo amakipe nka Al Ahly yo mu Misiri, Cape Town Tigers (South Africa), Petro de Luanda (Angola), City Oilers (Uganda), Ferroviario da Beira (Mozambique) na Seydou Legacy Athlétique Club (Guinea).
Nshobozwa usanzwe akinira APR BBC na we ari mu bakinnyi REG BBC izifashisha muri iyi mikino.
