Uwahoze ari Guverineri wa Kilifi, Amason Kingi, yatorewe kuba Perezida wa Sena ya Kenya .
Kuri uyu wa Kane, itariki 8 Nzeri 2022, Kingi yatowe nyuma yo kubona amajwi 46 kuri 67, bituma agira ubwiganze busesuye.
Amatora ye aje nyuma gato y’aho Kalonzo Musyoka yikuye mu ihiganwa ryo kuyobora Sena ya Kenya.
Uyu nk’uko tubikesha urubuga kenyans.co.ke, araba asimbura Kenneth Lusaka watorewe kuba Guverineri w’Intara ya Bungoma.
Kingi abaye Perezida wa gatatu wa Sena inyuma ya Ekwe Ethuro na Lusaka. Amaze gutorwa, yahise arahira.
Senateri wo muri Meru, Kathure Murungi na we yatorewe kuba perezida wungirije wa Sena.
Ibi byabaye nyuma y’uko Senateri wo muri Kilifi, Stewart Madzayo, nawe avuye mu ihiganwa.
Abakandida babiri gusa ni bo bari bamaze kwemererwa kwiyamamariza uwo mwanya.
