Leta Zunze Ubumwe za Amerika ziremeza ko Iran igifitiye inzika uwahoze ari minisitiri w’ububanyi n’amahanga, Mike Pompeo ndetse n’uwahoze ari intumwa idasanzwe ya Amerika muri Iran kubera iyicwa rya Gen. Qassem Soleimani .
Minisiteri y’ububanyi n’amahanga ya Amerika ibi yabimenyesheje inteko ishinga amategeko mu cyumweru gishize ivuga ko abo bayobozi bahoze muri leta ya Donald Trump bazira akazi bakoreye igihugu.
Ibiro Ntaramakuru bya Amerika, Associated Press, muri Werurwe byavuze ko minisiteri y’ububanyi n’amahanga yishyura buri kwezi miliyoni zisaga ebyiri z’amadolari yo gucunga umutekano wa Mike Pompeo na Brian Hook, wahoze ari intumwa idasanzwe ya Amerika muri Iran.
Nk’uko iyi nkuru dukesha VOA ivuga, abategetsi ba Iran bashinja abo bagabo bombi kuba ari bo batanze uburenganzira bw’igitero cya drone cyahitanye umuyobozi mukuru mu ngabo za Iran, Gen. Qassem Soleimni wiciwe i Baghdad muri Mutarama 2020.
Nubwo leta ya Amerika ikomeza kwishyura ayo mafaranga yo kurinda umutekano w’abahoze ari abayobozi muri leta ya Trump, ngo ikomeje ibiganiro na Iran ku masezerano y’ingufu za nikereyeri yo mu 2015.
Ni ibiganiro bimaze amezi byarahagaze ariko Leta Zunze Ubumwe za Amerika zivuga ko zifite icyizere ko mu gihe cya vuba bizasubukurwa.
