Arsenal yateye intambwe ikomeye igana ku gikombe cya shampiyona y’icyiciro cya mbere mu Bwongereza, English Premier League, nyuma y’ibinyacumi bigera hafi kuri bibiri imbere y’ikipe rukumbi yabatsinze umukino ubanza muri uyu mwaka w’imikino.
Wari umukino w’umunsi wa 21 wa English Premier League usifurwa na Antony Taylor kuri Emirates Stadium. Abatoza bombi bari bagerageje gukora ku ntwaro zabo zose havuyemo Scott MacTominay wasimbuye Casemiro utakinnye uyu mukino kubera ko yujuje amakarita atanu y’umuhondo.
Nyuma y’uminota 10 ya mbere yaranzwe n’umuvuduko wo hejuru cyane no kwatakana ku mpande zombi, ku munota wa 17 w’umukino amaze kwandagaza abakinnyi 4 ba Arsenal, Rashford yatsinze igitego cya mbere ku ruhande rwa Manchester United, cyaturutse ku mupira yari ahawe na Bruno Fernandes.
Nyuma yo gutsindwa igitego, Arsenal yahise ikanguka maze ku munota wa 23 Granit Xhaka ahindura umupira mwiza imbere y’izamu, maze Edward Nketiah aterekaho umutwe aba aragomboye.
Uku kunganya kwashyize abatoza bombi ku gitutu kuko ku munota wa 24 Arteta utoza Arsenal yeretswe ikarita y’umuhondo ku bwo kurenga urubuga rwe. Ku munota wa 42 Arsenal yari imaze gukora ku mipira 19 yose mu rubuga rw’amahina rwa Man United, United yo yakoze kuri 2 gusa. Nyuma y’iminota ibiri y’inyongera igice cya mbere cyarangiye bikiri 1-1.
Igice cya kabiri cyatangiranye impinduka, Ben White aha umwanya Tomiyasu. Byahise bitanga umusaruro kuko Tomiyasu yashyikirije agakira Bukayo Saka maze na we ahita yohereza ishoti ikomeye n’akaguru k’i bumoso, ubwo umupira uruhukira mu izamu.
Ku munota wa 58 nyuma y’akavuyo katewe na koroneri Eriksen yari azamuye, Lisandro Martinez yatsindiye United igitego cy’umutwe. Erik Ten Hag yakuyemo Antony yinjizamo Fred ku munota wa 70.
Ku munota wa 82, umutoza wa Arsenal yashyizemo Leandro Trossard ukiri mushya muri iyi kipe ya North London, yakirizwa amashyi ari ko asimbura Martinelli.
Ku munota wa 90, Arteta n’abahungu be bongeye gukongeza amatabaza ubwo Olexandr Zinchenko yagaruraga umupira mwiza imbere y’izamu, maze Ødegaard akorezaho Nketiah atsinda agashinguracumu. Nyuma y’iminota 3 y’inyongera, Taylor yarangije umukino maze i London babyina insinzi ya 3-2.
Ibi byashyize Arteta n’abasore be mu mujyo mwiza w’igikombe n’amanota 50, aho irusha Manchester City iyikurikiye amanota 5 yose, ibintu Arsenal yaherukaga mu myaka Arsène Wenger na Alex Ferguson watozaga United bahererekanyaga ibikombe hagati yabo.
