Ba Minisitiri batatu beguye muri guverinoma ya Repubulika ya Demukarasi ya Congo (RDC) bayoboka umunyapolitiki Moïse Katumbi uherutse gukura ishyaka ayoboye mu ihuriro Union Sacrée rya Perezida Félix Tshisekedi.
Abeguye ni: Christian Mwando wari Minisitiri w’igenamigambi, Chérubin Okende wari ushinzwe ubwikorezi na Véronique Kilumba wari ushinzwe ubuzima. Ubwegure bwabo babugejeje kuri Tshisekedi na Minisitiri w’Intebe, Michel Sama Lukonde kuri uyu wa 28 Ukuboza.
Ibiro bya Perezida wa RDC byatangaje ko byakiriye aba bayobozi, baganira n’Umukuru w’Igihugu hamwe na Sama, babamenyesha ko bashaka kuguma mu ishyaka Ensemble pour la République riyobowe na Katumbi.
Bisobanura ko abandi batatu, ari bo: Minisitiri w’ububanyi n’amahanga Christophe Lutundula, Minisitiri w’imibereho y’abaturage Modeste Mutinga Mutushayi na Minisitiri ushinzwe amashuri makuru na kaminuza, Muhindo Nzangi Butondo bo bahisemo kuguma muri Union Sacrée.
Kuguma muri iri huriro kwa Minisitiri Lutundula na bagenzi be babiri gusobanuye ko bafashe umwanzuro wo kwitandukanya na Ensemble ya Katumbi, baguma kuri iyi mirimo.
Tariki ya 16 Ukuboza 2022 ni bwo Katumbi yatangaje ku mugaragaro ko akuye ishyaka Ensemble mu ihuriro ry’imitwe ya politiki iri ku butegetsi. Yaboneyeho kumenyesha Abanyekongo ko aziyamamariza kuyobora RDC mu mwaka utaha.
