Ibitaro byigenga bya BAHO International byatangaje ko byababajwe n’ibyatangajwe n’ibinyamakuru ku baganga babyo babiri bakekwagaho uburangare mu rupfu rw’umurwayi witwa Kamanzi Ngwinondebe Chantal rwabaye tariki ya 8 Nzeri 2021 ndetse n’ibyemezo inzego zimwe zafashe.
Kamanzi wari ufite imyaka 54 y’amavuko yagiye muri ibi bitaro kwikurishamo agapira ko kuringaniza urubyaro tariki ya 7 Nzeri uwo mwaka, apfa nyuma yo kugakurwamo. Abakoresha imbuga nkoranyambaga bashinje abaganga b’ibi bitaro uburangare no kutagira ibikoresho bikenerwa muri serivizi batanga.
Ibitaro bya BAHO mu itangazo ryashyizweho umukono n’Umuyobozi Mukuru wabyo, Rukundo Lhin Pierre, ku wa 12 Mutarama, byasobanuye ko urubanza rw’abaganga babyo babiri: Dr Mugemanshuro Alfred na Dr Ntahonkiriye Gaspard bashinjwaga ‘kwica bidaturutse ku bushake’ Kamanzi rwakijijwe n’urukiko rw’ibanze rwa Kicukiro tariki ya 9 Ugushyingo 2022.
Bivuga ko urukiko rwanzuye ko ibimenyetso ubushinjacyaha bwatanze ‘ku kubura imiti n’ibindi bikoresho ndetse n’uburangare’ bw’abaganga, bidafite ishingiro.
Ibi bitaro bivuga ko ubuyobozi bwabyo bwamaganye ibyatangajwe n’ibinyamakuru byihutiye kwemeza ko aba baganga barangaranye Kamanzi kugeza apfuye, kandi ngo bubabajwe “n’inzego zimwe zihutiye gufata ibyemezo zitabanje gushishoza ngo herebwe ukuri.”
Bisobanura ko izi nzego zafashe ibi byemezo zishingiye ku byatangajwe cyane cyane n’ibi binyamakuru kandi ngo byabiteje ibibazo bikomeye byaturutse mu konona izina ryabyo.
Amakuru BWIZA yamenye ni uko umugabo wa Kamanzi, Jabo Paul, atanyuzwe n’umwanzuro w’urukiko rw’ibanze rwa Kicukiro, ndetse yasabye abashinjacyaha kuwujuririra mu rukiko rwisumbuye.
