Ubu umunota ku wundi, muri leta zitandukanye za Leta Zunze Ubumwe z’Amerika, baragenda batangaza uko amatora y’Umukuru w’Igihugu yo kuri uyu wa 3 Ugushyingo 2020 yagenze.
Nk’uko amakuru mashya y’Ibiro Ntaramakuru by’Abanyamerika (Associated Press) abigaragaza, Joe Biden uhagarariye ishyaka rya Democratic Party aragenda arusha insinzi Donald Trump uhagarariye Republican Party muri leta nyinshi.
Amakuru mashya agaragaza ko Joe Biden amaze kwegukana amajwi shingiro 224, mu gihe Trump we amaze kuzamurwa na leta ya Texas, ho amajwi 38, akaba ageze kuri 213.
Ni uku bihagaze mu matora ya USA
Donald Trump byagaragaraga ko yarushijwe cyane na Biden, ubu agenda azamuka gusa ntabwo anyurwa n’ibikomeje gutangazwa. Avuga ko bari kugerageza kwiba amatora, kugira ngo atayegukana.
Ku rubuga rwa Twitter, Donald Trump yagize ati: “Turi hejuru ariko bari kugerageza kwiba Amatora. Ntabwo tubemerera kubikora. Ntabwo tuzigera tubemerera kubikora. Amajwi ntashobora gutangwa itora ryamaze gufunga.”
Ni mu gihe Joe Biden we mu butumwa yagejeje ku Banyamerika, yagize ati: “Twamenya ibyavuye mu matora mu gitondo kare ariko si ahanjye na Trump ngo dutangaze uwatsinze amatora. Ni icyemezo cy’Abanyamerika.”
Kugeza ubu biragoye kumenya utsinda aya matora hagati ya Trump na Biden kuko imibare ihinduka buri kanya; umwe yegukana insinzi muri leta imwe, undi mu yindi. Birasaba gutegereza ubwo leta zose ziraba zimaze gutangaza ibyavuyemo.
2 Responses
Bari kugerageza kwiba amatora_Donald Trump
Trump aratorwa ntakabuza
Bari kugerageza kwiba amatora_Donald Trump
Trump aratorwa ntakabuza