Harry Kane ayoboye urutonde rw’abakinnyi bakomeye ku mugabane w’Uburayi batsinze ibitego byinshi ariko bidaherekejwe n’igikombe icyo ari cyo cyose.
Nta gihe gishize rutahizamu w’Umwongereza Harry Kane atsinze igitego cya 200 muri Premier League kikaba n’icya 267 atsindiye Tottenham Hotspurs, bikiyongeraho n’ibitego 53 yatsindiye ikipe y’igihugu y’u Bwongereza agahita yuzuza ibitego 320 muri rusange.
Ku cyumweru tariki ya 5 Gashyantare ubwo mu mukino wa Premier League Tottenham Hotspur yisasiraga Manchester City igitego 1-0, Kane yujuje ibitego 320 bitagira igikombe cyaba igikinirwa imbere mu gihugu, icyo ku rwego rw’umugabane yewe no mu ikipe y’igihugu.
Icyo gitego cya Kane cyakuyeho agahigo kari gafitwe na Jimmy Greaves wari waratsindiye Tottenham ibitego 266 mu marushanwa yose, ndetse ahita aba n’uwa gatatu mu bamaze gutsinda ibitego byinshi muri shampiyona y’u Bwongereza n’ibitego 200 inyuma ya Alan Shearer wa mbere ufite 260 na Wayne Rooney wa kabiri ufite 208.
Nubwo bimeze bityo ariko, Harry Kane yihumurije ku bikombe akina imikino ya nyuma nka League Cup muri 2014/15 na 2020/21, UEFA Champions League muri 2018/19, ndetse na Euro y’ibihugu muri 2020 hamwe n’u Bwongereza.
Harry Kane kandi si we wenyine utarahiriwe no kwambikwa ikamba kuko hari n’abandi nka Dimitri Payet bakinnye imikino myinshi ariko ntibagire umudari n’umwe bambara.
Dore urutonde rw’abakinnyi 10 batsinze ibitego byinshi ariko ntibatware igikombe icyo ari cyo cyose.
10. Wahbi Khazri: Yatsinze ibitego 107
9. Cristhian Stuani: Yatsinze ibitego 113
8. Gylfi Sigurdsson: Yatsinze ibitego 116
7. Kevin Volland: Yatsinze ibitego 125
6. Luis Muriel: Yatsinze ibitego 140
5. Mustapha Hadji: Yatsinze ibitego 146
4. Dimitri Payet: Yatsinze ibitego 148
3. Vedad Ibisevic: Yatsinze ibitego 184
2. Antonio Di Natale: Yatsinze ibitego 258
1. Harry Kane: Yatsinze ibitego 320
