Umunyamabanga wa Leta zunze ubumwe za Amerika, Antony Blinken, arasaba Leta ya Israel kurwanya umutwe wa Hamas nk’uko yabirahiriye, ariko ikirinda kubabaza abatuye mu gice cya Gaza Strip.
Blinken yatangarije ibi abanyamakuru i Cairo mu Misiri kuri uyu wa 15 Ukwakira 2023, nyuma y’uruzinduko yagiriye muri Israel rwari rugamije kwereka iki gihugu ko USA igishyigikiye muri ibi bihe cyagabweho ibitero n’umutwe wa Hamas.
Yagize ati: “Israel ifite uburenganzira, yewe ifite inshingano zo kwirinda ibi bitero bya Hamas, ikanagerageza uko ishoboye mu gutuma bitazasubira. Nk’uko nabivugiye muri Tel Aviv, nk’uko Perezida Biden yabivuze, uburyo Israel ibikoramo burebwaho. Ikwiye kubikora mu buryo bugendera ku ndangagaciro duhuriyeho ku buzima bw’umuntu n’agaciro ke, agafata ingamba zose mu kwirinda kubabaza abasivili.”
Blinken yatangarije abanyamakuru ko USA ishyigikiye Israel, arongera abisubiramo ati: “Dushyigikiye Israel uyu munsi, ejo na buri munsi, kandi tubikora mu magambo no mu bikorwa.”
Uyu Munyamabanga atangaje ibi nyuma y’aho ubuyobozi bwo muri Palestine buvuga ko kuva iyi ntambara yatangira tariki ya 7 Ukwakira 2023, abantu barenga 1300 bo muri Gaza bamaze kwicwa n’ibitero bya Israel. Israel yo irabarura abarenga 800.
