Umunyamakuru Bob Rugurika uyobora radiyo RPA (Radio Publique Africaine) ikorera mu buhungiro, aravugwaho gukorana bya hafi na Gen. de Pol. Alain Guillaume Bunyoni wabaye Minisitiri w’Intebe w’u Burundi.
Uyu munyamakuru ari ku rutonde rw’abantu 34 Leta y’u Burundi imaze imyaka myinshi ishakisha, ibakurikiranyeho uruhare mu kugerageza guhirika ubutegetsi bwa Pierre Nkurunziza muri Gicurasi 2015.
Ikinyamakuru Ikiriho, mu butumwa burebure cyatangarije kuri Twitter kuri uyu wa 18 Mata 2023, cyavuze ko Gen. Bunyoni yifashishije Rugurika ngo amukorere konte yitwa ‘Dr Mokonzi’ yagombaga kwifashishwa mu kwibasira ubutegetsi bwa Perezida Evariste Ndayishimiye.
Cyagize kiti: “Abizewe bavuga ko Bunyoni yihishe inyuma ya Dr Mokonzi, konte yakorewe na Bob Rugurika. Ibi bigaragaza impamvu Bob yibona nk’umuntu ufite amakuru yizewe.”
Iki kinyamakuru cyagaragaje ubutumwa Bob yaba yarandikiranye na Bunyoni kuri email tariki ya 13 n’iya 16 Gashyantare 2023, bunoza imikoranire yabo bombi, haganishwa ku kwibasira ubutegetsi bwa Perezida Ndayishimiye.
Ikindi, ngo Bunyoni yatumye Bob gukorana n’umunyamakuru Hubert Leclerq wa La Libre Afrique, akajya amubwira inkuru akora kandi bakamwishyira abinyujije kuri uyu muyobozi wa RPA. Ikiriho kiti: “Kuva muri Mutarama, [Bob] yishyuwe na Bunyoni amayero arenga ibihumbi 39 arimo ibihumbi 17 bya Hubert Leclerq.”
Umunyamakuru w’Umurundi ukorera radiyo mpuzamahanga y’Abafaransa, Esdras Ndikumana, amaze kubona aya makuru yatangajwe na Ikiriho, yahamije ko iki kinyamakuru cyayahawe n’urwego rushinzwe iperereza ryo hanze, SNR, kandi rugitegeka kuyatangaza.
Inkuru y’abashakishwa na Leta y’u Burundi barimo Bob https://bwiza.com/?Urutonde-rw-abashakishwa-bashinjwa-kugerageza-guhirika-ubutegetsi-bwa
Ndikumana yagize ati: “Uruhererekane rwa tweets za Ikiriho, rwategetswe na SNR izwi, ikorana bitaziguye n’Umukuru w’Igihugu rugaragaza mu buryo bugaragarira rubanda ugutandukana kwa burundu hagati ya Evariste Ndayishimiye n’uwahoze ari nimero ye ya 2, Gen. Bunyoni, mu gihe bivugwa ko atari mu gihugu.”
Bob yaraye atangaje ko ibyo Donatien Ndayishimiye uyobora Ikiriho yatangaje ari ibihimbano kandi ko ntacyo abivugaho. Ati: “Nshuti, uyu munsi wose ntabwo niriwe ku murongo. Ariko ntimunsabe kuvuga cyangwa gusubiza ku binyoma n’inkuru mpimbano ya Donatien Ndayishimiye wa Ikiriho.”
Aya makuru agiye hanze nyuma y’aho abashinzwe umutekano basatse urugo rwa Gen. Bunyoni ruherereye mu ntara ya Rutana n’uruherereye i Bujumbura tariki ya 17 Mata, bashaka kumenya niba koko bahishe amafaranga menshi. Ngo basanze we adahari, bikaba bivugwa ko yahungiye muri Tanzania.
