Nyuma yo gukubitwa inshuro bitavugwaho rumwe mu matora yo kuziba icyuho y’umudepite uzahagararira Soroti y’iburasirazuba usimbura uwagiye, mu cyumweru gishize, abayobozi b’abatavuga rumwe n’ubutegetsi muri Uganda, Kizza Besigye na Robert ‘Bobi Wine’ Kyagulanyi batangaje ko bagiye guhuriza hamwe imbaraga mu gushakisha uburyo bushya bwo guhindura ubutegetsi.
Kuri uyu wa Mbere mu kiganiro n’abanyamakuru cyabereye kuri imwe mu mahoteri yo muri Kampala kugira ngo batangaze umuhigo wabo wo gufatanya, abayobozi b’amashyaka akomeye atavuga rumwe n’ubutegetsi banze gufata umwanzuro wo kuzanga kwitabira amatora ataha.
David Lewis Rubongoya, umunyamabanga wa NUP ya Bobi Wine, yabwiye iki kinyamakuru ati: “Dushobora kuzitabira amatora amwe ariko ubutumwa bugomba guhinduka.”
Ati: “Ikibazo cyo kutazitabira kiracyaganirwaho kandi nidufata umwanzuro, tuzabimenyesha rubanda.”
Bobi Wine yatangajwe ko yegukanye umwanya wa kabiri mu matora y’umukuru w’igihugu ya 2021 n’amajwi 35%, hafi y’amajwi Besigye yagize ubwo aheruka guhatana na perezida Museveni mu 2016 nk’uko tubikesha Daily Monitor.
Aya mashyaka atavuga rumwe n’ubutegetsi yari yashyize umukono ku masezerano y’ubufatanye mu mwaka wa 2020 nk ‘“imbaraga zishyizwe hamwe ziharanira impinduka” ariko gukekana no kutizerana byababujije gutanga abakandida bahuriweho mu matora ya perezida n’inteko ishinga amategeko.
Bobi Wine yagaragaye nk’ushyigikiwe na Besigye ariko abo bayobozi bombi batandukanye ku ngamba mbere y’amatora yo mu 2021. Uyu munyapolitiki ukuze wiyamamarije kuba perezida mu 2001, 2006, 2011 na 2016, yavuze ko amatora yo muri iki gihe adashobora kuzana impinduka muri guverinoma, maze ahamagaza imyigaragambyo.
Ku ruhande rwe, Bobi Wine wiyamazaga bwa mbere mu matora ya perezida nyuma yo kurangiza manda ye ya mbere mu Nteko Ishinga Amategeko, ntiyemeranyije na Besigye ahubwo amushinja kwitabira amatora kandi ayamagana.
