Peace Karate Academy ni Club ya Karate ibarizwamo abana,ikorera mu murenge wa Mayange,Akarere ka Bugesera,Intara y’Iburasirazuba.Ababyeyi bafite abana muri ino Club bakomeje kuvugako kuva abana babo batangira gukina uyu mukino wa Karate byahinduye byinshi mu buzima bw’abana babo.
Ubuyobozi bwa Peace Karate Academy bwahamirije BWIZA ko butazatezuka gushyira imbaraga mu gufasha no kuzamura impano z’abato by’umwihariko muri uyu mukino wa Karate.
Ibi bikaba byagarutsweho kuri uyu wa 31 Kanama 2024 ubwo abana 34 bahabwaga ikizamini cyo kubazamura mu ntera bakabona umukandara(belt) wisumbuye kuwo bari basanganywe bishingiye uko bitwaye mu bizamini bahawe.
Iki gikorwa kikaba cyitabiriwe n’ingeri zitandukanye biganjemo ababyeyi bafite abana babarizwa muri iyi Club,abavandimwe n’abana bakoraga ibizamini ndetse n’Umuyobozi Ushinzwe Komisiyo y’Abasifuzi muri FERWAKA, Ndayambaje Onesphore ndetse ni nawe watanze ibizamini bizamura mu ntera aba bana 34.
Uwamahoro Ignace,ni Umubyeyi uhagarariye abandi muri iyi Club Peace Karate Academy afite abana 2 babarizwa muri iyi club,avugako uyu mukino wafashije abana be no mubuzima busanzwe bakaba barahinduye imitsindire mu ishuri bakaba basigaye batsinda neza.
Ati:” Inyungu twabonyemo zikomeye,uyu mukino wafashije abana kujya kumurongo,urwego rwimitsindire mu ishuri nsrwo rwariyongereye,ikiruta kuri ibyo ni umukino uha abana gusabana,ukabafungura mu mutwe kuburyo ibyo bakora byose nabyo biba biri kumurongo.”
Uwamahoro asoza aha ubutumwa ababyeyi ko bajyana abana babo kujya kwiga Karate kuko ubwabyo baba baba barimo gukora Siporo kandi barabizi ko ari ubuzima.
Ingabire Dianne nawe ni umubyeyi ufite abana 3 muri iyi Club ya Peace Karate Academy,avuka go Club yabafashije cyane mu kuzamura ikinyabupfura cy’abana.
Ati:” Byaradufashije cyane,ubona abana babangutse mu bintu byose,mu mitsindire byarahindutse cyane ubona ari umukino ufungura abana mu mutwe,abana baratsinda neza ugereranyije na mbere yo kuza muri Club.” Yaboneyeho no gusaba ababyeyi kujyana abana gukina uyu mukino kuko bituma bagira ikinyabupfura bikabarinda kugira umujinya.
