Amadosiye abiri y’ubucamanza yasuzumwe n’Urukiko Rukuru rwa Gisirikare ku rwego rw’ubujurire mu mujyi wa Bunia, ku wa gatanu ushize, aho imwe muri izi dosiye yaregwagamo abasirikare bakuru ba FARDC gucuruza intwaro ku mutwe w’inyeshyamba wa CODECO .
Dosiye ya mbere ijyanye n’urubanza rwo “kugurisha amasasu y’intambara” ku barwanyi ba CODECO naho iya kabiri ijyanye n’ubwicanyi bwibasiye Abashinwa babiri bakibwa n’udutafari tune twa zahabu n’Amadolari 6000.
Muri dosiye yerekeranye n’ikibazo cyo kugurisha amasasu y’intambara ku barwanyi, hari abaregwa cumi na batanu, barimo Lt. Col. Marcel Kalengamire, Major Kalonda Muloko uzwi ku izina rya Ninja, na Solange Lotsove Makusi, bose bakatiwe igihano cyo gufungwa burundu.
Mu iburanishwa, abaregwa hafi ya bose bahakanye ibyo baregwa ariko bavuguruza ibyo bari batangaje imbere ya OPJ, umushinjacyaha ndetse n’urukiko rwa gisirikare rwa Ituri.
Gusa Major Kalonda Muloko, uzwi ku izina rya Ninja, we yemeye ibyo aregwa avuga ko “yahaye” umuyobozi witwa Lobo w’inyeshyamba za CODECO chargeurs eshatu zuzuye amasasu. Akomeza avuga ko aya masasu yari agamije gufasha abarwanyi kurwanya indi mitwe yanga inzira y’amahoro.
