Kuri uyu wa Mbere, i Ouagadougou muri Burkina Faso hasubukuwe urubanza ku iyicwa rya Thomas Sankara wishwe ku itariki ya 15 Ukwakira 1987 nyuma y’ibyumweru bibiri rusubitswe.
Ni urubanza rwatangiye ku itariki 11 Ukwakira mu rukiko rwa gisirikare nyuma y’imyaka 34 Sankara yishwe muri coup d’etat yashyize ku butegetsi Blaise Compaore uregwa muri uru rubanza.
Abunganira abaregwa nibo bari basabye ko urubanza rusubikwa kugirango babone umwanya uhagije wo kwiga impapuro zigera mu 20,000 zigize dosiye y’ikirego.
Abantu 12 muri 14 baregwa kuri uyu wa Mbere bari bari mu rukiko ubwo urubanza rwasubukurwaga barimo, Gen. Gilbert Diendéré w’imyaka 61, umwe mu bari abayobozi bakuru b’ingabo mu 1987.
Uza ku isonga mu baregwa ni Blaise Compapore, wirukanwe ku butegetsi mu 2014 kuva yabufata mu 1987, wanze kwitabira urubanza yita urwa politiki.
Uyu uri mu buhungiro muri Cote d’Ivoire kuva yakurwa ku butegetsi, ndetse akaba yarahawe ubwenegihugu, ashinjwa uruhare mu iyicwa rya Sankara, guhisha imirambo no kubangamira umutekano w’igihugu.
Ibi byaha ni nabyo biregwa Gen. Diendéré usanzwe ari muri gereza muri Burkina Faso nyuma yo guhamwa n’icyaha cyo kugerageza guhirika ubutegetsi mu 2015.
Mu baregwa kandi harimo abahoze ari abasirikare mu mutwe ushinzwe kurinda Blaise Compaore nka Adjudant-chef Hyancinthe Kafando, ubu uri mu buhungiro ukekwaho kuba ari we wari uyoboye umutwe w’abakomando bishe Thomas Sankara.
Umugore wa Sankara, Mariam, waturutse mu Bufaransa agiye gukurikirana urubanza ku iyicwa ry’umugabo we, yari yasabye ko uru rubanza ruzafatirwa amashusho kugirango ruzabe amateka ariko ubu busabe urukiko rubutera utwatsi ubwo rwatangiraga.
