Amakuru mahimbano yakwirakwiye ku mbuga zitandukanye mu gitondo cy’uyu wa 1 Werurwe 2020, avuga ko mu Burundi hagaragaye umurwayi w’icyorezo cya Coronavirus, wari uturutse mu Bushinwa.
Nk’uko bigaragara ku ifoto yahimbwe, uwayikoze yashyizeho ko yaturutse ku gitangazamakuru cya France 24, aho agira ati: “Urgent: Premier Cas de Coronavirus au Burundi” mu Kinyarwanda bisobanuye ngo: “Umurwayi wa mbere wa Coronavirus mu Burundi”.
Aya makuru yari atangiye guca igikuba mu Burundi ndetse n’ibihugu bihana imbibi, yahise anyomoza n’umuvugizi wa Minisiteri y’Ubuzima muri iki gihugu, Dr. Jean Bosco Girukwishaka mu makuru dukesha Iwacu.info, agira ati: “Ni amakuru y’amahimbano.”
Nyuma y’ubutumwa bw’ihumure bwa Dr. Girukwishaka, abakoresha izi mbuga batangiye kwamagana iki gihuha kugira ngo hatagira ugifata nk’ukuri. Umwe muri bo witwa Emerimana agira ati: “ Kuruyu w’Imana Hari igihwuhwa, ikinyoma cambaye ubusa kiriko gikwiragizwa kumbuga ntangazamakuru zitandukanye.”
Akomeza agira ati: “Vyukuri abantu barakwiye kwiga kwigengesera mugukoresha ubuhinga ntangazamakuru no kumenya gushishoza ku nkuru bagira batange kwar’iyukuri canke atariy’ukuri.”
Imibare mishya kuri Coronavirus
Mu ntango za Mutarama 2020 ni bwo icyorezo cya Coronavirus nshya (COVID-19) cyagaragaye mu mugi wa Wuhan mu ntara ya Hubei mu Bushinwa. Amakuru y’ikinyamakuru cy’igihugu, Xinhua, avuga ko abantu 79,824 bamaze kwandura nyuma y’imibare mishya y’abandi bantu 573 bagaragayeho iki cyorezo kuri uyu wa 29 Gashyantare. Abantu kimaze kwica mu Bushinwa honyine ni 2,870.
Iki kinyamakuru kandi kivuga ko abantu 41,625 bamaze gukira, basezererwa mu bitaro, abandi basigaye baracyitabwaho.
Ibihugu birenga 50 ku isi yose ni byo bimaze kugaragaramo abarwayi ba Coronavirus. Ku mugabane w’Afurika hamaze kugaragara abarwayi ba Coronavirus batatu mu bihugu bya: Misiri, Algeria na Nigeria gusa ho uwagaragaye afite ubwenegihugu bw’Ubutaliyani.
Iki cyorezo cyateje impagarara mu mahanga yose bitewe n’uburyo gikwirakwira vuba, cyane ko hari ibikorwa bitandukanye nk’ingendo zo mu kirere byahagaze kugira ngo birinde abaturage babyo ibyago byo kwandura. Mu Butaliyani ho, hari imikino y’umupira w’amaguru igera kuri itanu byari biteganyijwe ko ikinwa nta mufata uri muri sitade. Nta gitangaje kumva ko iyo mu gihugu bumvishe inkuru ya Coronavirus, bashya ubwoba.
