Major Marius Gahomera wo mu gisirikare cy’u Burundi yasimbujwe ku buyobozi bwa batayo ya 44 y’ingabo z’iki gihugu muri AMISOM, aho bivugwa ko uku gusimburwa ari ingaruka z’ibyaha bikomeye byo guhonyora uburenganzira bwa muntu ashinjwa. Yasimbujwe Major Ntirampemba.
Izi mpinduka zije iminsi mikeya mbere y’uko iyi batayo ya 44 yoherezwa muri Somalia mu butumwa bwo kubungabunga amahoro. Amakuru yizewe aturuka mu begereye ubuyobozi bw’ingabo z’u Burundi, avuga ko Major Ntirampemba n’ubundi yahoze ayoboye batayo ya 28 muri AMISOM yari yasimbuwe mu 2015.
[xyz-ihs snippet=”google-pub”]
Amakuru atandukanye agera kuri radio RPA yo mu Burundi dukesha iyi nkuru, avuga ko Major Gahomera yasimbujwe kubera ibyaha bikomeye byo guhonyora uburenganzira bwa muntu ashinjwa.
Mu byaha ashinjwa hakaba harimo urupfu rw’abantu 7 biciwe ahitwa Mujejuru mu Ntara ya Bujumbura. Aba bakaba bari batawe muri yombi bashinjwa uruhare mu gitero cyagabwe ku kigo cya gisirikare mu Ukuboza 2015, aho bivugwa ko bakuwe na Major Gahomera aho bari bafungiye mu kigo cya gisirikare bagiye kwicwa.
Icyo gihe uwari Umushinjacyaha Mukuru wa Repubulika yategetse ko Major Gahomera atabwa muri yombi ariko ntibyubahirizwa kugeza uyu munsi.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
