Igipolisi cy’u Burundi kivuga ko cyataye muri yombi umusore kivuga ko ari we wari uyoboye igitero cyo mu Ruhagarika mu Ntara ya Cibitoke kigahitana abantu 26 abandi 7 bagakomereka.
Ni agace kari ku mbibi z’u Burundi na Repubulika Iharanira Demokarasi ya Congo cyagabwe mu kwezi kwa Gatanu uyu mwaka. Dismas Ndayisaba w’imyaka 28 y’amavuko wemeza ko ari umurwanyi wa RED Tabara, iyobowe na Alexis Sinduhije, avuga ko ari we wabatumye.
Nk’uko bitangazwa na Minisiteri y’umutekano, ngo uwo musore avuga ko akomoka mu Ntara ya Kayanza, muri Komini Gahombo, akaba yarafatiwe muri Congo mu mpera z’icyumweru gishize.
Dismas Ndayisaba ngo avuga ko ari we wari uyoboye igitero cyahitanye abantu 26, akaba avuga ko bari abarwanyi 14 bakigabye.
Nk’uko BBC ibitangaza ngo aba barwanyi bakambitse mu duce twa Kitavugampegeri na Kiryama twegereye ahitwa Lemera na Mulenge muri Kivu y’Amajyepfo.
Yemeza ko n’igitero cyagabwe mu byumweru bibiri bishize muri zone ya Gatumba komine Mutimbuzi cyagabwe na Red Tabara.
