Abacanshuro babiri b’Abarusiya bo mu isosiyete yigenga ishinzwe umutekano ya Wagner bishwe abandi bane barakomereka mu gitero cy’inyeshyamba mu majyaruguru y’uburengerazuba bwa Bangui, umurwa mukuru wa Centrafrica.
Kuri uyu wa Mbere, itariki ya 30 Gicurasi 2022, ku rubuga rwawo rwa Facebook, Ihuriro ry’imitwe irwanya ubutegetsi ‘Coalition des patriotes pour le changement’ ryerekanye ko “abacanshuro babiri b’Abarusiya bishwe abandi bane bakomeretswa n’ingabo zacu i Bossemptélé”, agace gaherereye mu birometero 369 mu majyaruguru y’iburengerazuba bw’umurwa mukuru wa Repubulika ya Centrafrica, Bangui.
Mu nkuru yacyo y’umunsi, ikinyamakuru Corbeau News cyanditse ko “abacanshuro babiri b’Abarusiya bo mu isosiyete ya Wagner bishwe, abandi bane barakomereka mu gitero cy’abantu bitwaje intwaro bagaragajwe n’abaturage baho ko ari inyeshyamba z’ihuriro Coalition des patriotes pour le changement (CPC)…”
“Itsinda ry’irondo ry’abacanshuro b’Abarusiya, bari ku mapikipiki agera kuri makumyabiri, baturutse i Bossemptélé, berekeza muri komini ya Gaga, ahacukurwa amabuye y’agaciro, bagabweho igitero n’inyeshyamba z’ihuriro Coalition des patriotes pour le changement “, ibi ni ibyatangajwe na kimwe mu binyamakuru byigenga muri ii gihugu.
Iyi nkuru ikomeza ivuga ko habayeho kurasana mu gihe cy’isaha hagati y’izi nyeshyamba n’abacanshuro b’Abarusiya.
