Nibura abanyamahanga barindwi birukanywe ku butaka bwa Repubulika ya Centrafrica. Barashinjwa na guverinoma ibyaha by’ubutasi no gukoresha inyandiko mpimbano.
Abirukanwe ni umuturage w’Umugereki Jorgatselos Rectios Djiordios, n’aba Vietnam, Youti Tioutra, Dan-Ngok Pao, Tang-ti Ta-wan, La-King-Wan, Lo-ti Tana na Laï-Tang Kouang nk’uko tubikesha Journal de Bangui.
Bose baregwa icyaha cyo gukora no gukoresha inyandiko mpimbano n’ubutasi nk’uko bigaragara mu cyemezo cya minisiteri y’umutekano gikubiye mu iteka ryo ku ya 18 Kanama 2022. Guverinoma yasanze abo bantu bafite imico ikemangwa.
Minisitiri w’umutekano, Michel Nicaise Nassin, yabujije aba kongera gukandagira ku butaka bwa Centrafrica ukundi. Inzego zishinzwe umutekano no kubahiriza amategeko zasabwe gutuma icyemezo cyubahirizwa.
Iyi nkuru ivuga ko hari hashize imyaka Centrafrica itirukana abanyamahanga bari ku butaka bwayo. Bikaba bivugwa ko abahambirijwe bamaze kuva mu gihugu.
