Ku wa kane tariki ya 3/11/2016, Komisiyo y’Igihugu yo Kurwanya Jenoside yagiranye inama na za Kaminuza n’amashuri makuru yo mu Rwanda.Inama yitabiriwe n’ibigo bigera kuri 46. Mu kuyobora iyo nama, Dr Gasanabo Jean Damascène yafatanyije na Hon. Gatabazi Jean Marie Vianney, umudepite uri mw’Ihuriro rishinzwe kurwanya jenoside mu Nteko Ishingamategeko.
[ad id=”44145″]
Intego nyamukuru y’iyo nama kwari ugutegura umunsi w’itariki 9/12/2016. Kuri uwo munsi nibwo Umuryango w’Abibumbye washyizeho amasezerano agamije gukumira icyaha cya jenoside n’ibindi byaha byibasira inyokomuntu. Hari mu 1948. Kuva mu 2012, Komisiyo y’Igihugu yo Kurwanya Jenoside ifatanya na za kamininuza n’amashuri makuru gukangurira urubyiruko rw’abanyeshuri, abarimu ndetse n’abaturage begereye izo za kaminuza kurwanya jenoside n’ingengabitekerezo yayo ndetse no gukangurira abantu igikorwa cyo guhangana n’ihakana n’ipfobya bya Jenoside yakorewe Abatutsi.
Muri iyi nama, Hon. Gatabazi Jean Marie Vianney yasobanuye imikorere y’Ihuriro ry’abadepite rishinzwe kurwanya jenoside. Yibukije ko inshingano z’iryo huriro ari:
-Kwumvikanisha impamvu zo guhozaho mu kurwanya ingengabitekerezo ya jenoside.
-Kumenyekanisha itegeko rihana iyo ngengabitekerezo.
-Gufasha abantu kudashishikariza cyangwa kudashishikarizwa gukora jenoside.
-Gukora ubushakashatsi kugira ngo hamenyekane ukuri, haba mu Rwanda cyangwa mu mahanga kuri Jenoside yakorewe Abatutsi.
Hon. Gatabazi yasabye abayobozi ba za kaminuza n’amashuri makuru, abarimu n’abanyeshuri kwishyira hamwe, nabo bakumva ko inshingano zo guhashya ingengabitekerezo, ihakana n’ipfobya bya Jenoside yakorewe Abatutsi bireba buri munyarwanda.
Dr Gasanabo Jean Damascène wari uhagarariye Komisiyo y’Igihugu yo Kurwanya Jenoside, yibukije impamvu y’iyo nama,avuga imirongo mikuru y’ibikubiye muri raporo y’ibyakozwe umwaka ushize, asobanura n’imirongo migari yerekana ibyaranze Jenoside yakorewe Abatutsi bikaba byagenderwaho mu gihe cyo gutanga ibiganiro.
[ad id=”44145″]
Uwaje ahagarariye Kolegi y’Ubuhinzi n’Ubuvuzi bw’amatungo riri muri Kaminuza y’U Rwanda, yasangije abandi uko bo babigenza mu gikorwa cyo gukangurira abantu kurwanya ingengabitekerezo ya jenoside. Yababwiye ukuntu bafanya n’inzego zose: abayobozi, abarimu, abanyeshuri ndetse n’abaturage. Bituma bamenya amakuru menshi ku byabaye mu mateka y’u Rwanda. Yabamenyesheje kandi ko bahisemo gukoresha ikinamico ngo bigishe ayo mateka. Bariho baranakora ubushakashatsi k’uruhare rw’urubyiruko mu kurwanya ingengabitekerezo ya jenoside. Ubwo bushakashatsi burakorerwa mu mirenge yo mu Turere twa Musanze na Nyabihu, bakaba bifuza kubutangaza mu gihe cyo kwibuka Jenoside yakorewe abatutsi ku nshuro ya 23.
Mbere yo gusoza inama, abayitabiriye bumvikanye ibi bikurikira:
-Kwigisha urubyiruko amateka ya Jenoside yakorewe Abatutsi.
-Guhugura abantu kugira ngo bajye batanga ibiganiro kw’ihakana n’ipfobya bya Jenoside yakorewe abatutsi ndetse no kurwanya ingengabitekerezo ya jenoside.
-Gufatanya mu gikorwa cy’ubushakashatsi kuri jenoside no kubungabunga ibimenyetso byayo.
-Gukangurira abarimu gufasha abanyeshuri gushinga za “clubs anti-génocide” kugira ngo bidaharirwa urubyiruko gusa.
-Kwifashisha amasomo yigishwa ngo havugwe ibijyanye no gukumira jenoside ndetse no kurwanya ingengabitekerezo yayo.
-Gufatanya n’Ihuriro ry’Inteko Ishingamategeko rishinzwe kurwanya jenoside.
Mu rwego rwo gutegura umunsi w’itariki 9/12/2016, Komisiyo y’Igihugu yo Kurwanya Jenoside yemeye ko izatanga ikiganiro ngenderwaho kizifashishwa, asaba abarimu n’abashakashatsi kuwutegura neza, abemerera ubufatanye kandi abamenyesha ko komisiyo izafatanya n’Inteko Ishingamategeko mu gutanga ibiganiro aho bizashoboka.
K anda hano ujye ubona amakuru yihuse kandi kugihe kuri Facebook no kuri twitter
@bwiza.com
