Impuguke mu by’ubuzima mu Bushinwa zivuga ko icyorezo gishya cya Coronavirus gishobora kwica abantu barenga miliyoni 45, mu gihe 60% bya miliyari 7.5 z’abatuye isi, ngo bishoboka ko bayandura mu gihe kidafatiwe ingamba zikakaye. Ni mu gihe iki gihugu n’isi bihangayikishijwe n’iki cyorezo kimaze kugira ingaruka zikomeye mu buzima bwabyo.
Nk’uko ikinyamakuru The Guardian dukesha aya makuru kibivuga, Prof. Gabriel Leung uhagarariye ishami ry’ubuzima muri Kaminuza ya Hong Kong, avuga ko iki cyorezo ari umwanzi ukomeye w’uyu mubumbe.
Dr. Tedros Adhanom uyoboye Ishami ry’Umuryango w’Abibumbye ryita ku buzima (OMS/WHO) yavuze ko iki cyorezo bisaba byibuze amezi 18 kugira ngo kibonerwe urukingo. Abona Novel Coronavirus iteye inkeke kurusha ibitero by’iterabwoba. Yavuze ko umuntu wafashwe nacyo, ashobora kwanduza bagenzi be 2.5, bivuze ko abandura bashobora kugenda bikuba inshuro zirenga ebyiri.
60% by’abantu bashobora kwandura iki cyorezo barenga miliyari 4 z’abatuye isi. Prof. Leung asobanura ko muri aba miliyari 4, bazajya bapfa ku kigero gito byibuze kingana na 1%, bisobanuye ko abantu barenga miliyoni 45 gishobora kubica.
Umubare w’abantu bicwa na Novel Coronavirus mu Bushinwa ugenda wiyongera umunsi ku wundi, bigaragara ko nta cyizere cy’uko cyarandurwa mu bihe bya vuba. Ibi birajyana n’ubushakashatsi bwa WHO. Tariki ya 9 Gashyantare 2020, Dr. Tedros mu makuru yakuye mu Bushinwa, yavuze ko 42708 bari bamaze kwandura, mu gihe 1017 bari bamaze gupfa. Amakuru mashya y’uyu munsi tariki ya 13 Gashyantare, avuga ko abantu 48206 ari bo bamaze kwandura, mu gihe 1310 barimo 242 bashya bamaze gupfa, bose mu Bushinwa.
