Perezida wa Leta Zunze Ubumwe z’Amerika , Donald Trump kuri uyu wa 30 Mata 2020 yatangaje ko abantu bapimwe icyorezo cya Covid-19 mu gihugu cye baruta abapimwe mu bindi bihugu biri ku Isi byihurije hamwe.
Abantu barenga miliyoni 6 ni bo bamaze gupimwa iki cyorezo muri iki gihugu. Uyu mubare uri hejuru cyane y’uw’ibindi bihugu byugarijwe cyane n’icyorezo, biza bikurikira Amerika.
Perezida Trump ngo ibihugu bituye Isi byose byihurije hamwe, ntibyageza ku bipimo miliyoni 6. Muri videwo iri ku rubuga rwa Twitter rw’Ingoro ya White House ati: “Twapimye abarenze ab’ibindi bihugu byose byihurije hamwe. Uburyo bwo gupima burahambaye.”
Tariki ya 27 Mata 2020 ni bwo uyu Mukuru w’Igihugu yavuze ko bafite ubushobozi bwo gupima abantu 200,000 ku munsi, yongeraho ko mu gihe gito baraba bapima abantu miliyoni 5 ku munsi umwe, ibintu byafashwe nk’amakabyankuru n’abarimo Adm. Brett. Giroir uri mu bayoboye gahunda yo gupima Covid-19 muri iki gihugu.
Donald Trump yongeye kugaruka ku kuba Amerika igaragaza abarwayi benshi ba Covid-19, ari uko ikoresha ukuri. Yizera ko hari ibihugu bidatangaza imibare yuzuye, byakabaye biza imbere y’igihugu ayoboye.
Tariki ya 29 Mata yabisubiyemo ati: “Impamvu yonyine US imaze kubona abanduye miliyoni ni uko uburyo ipimamo buri ku rwego rwo hejuru kurusha igihugu icyo ari cyo cyose ku Isi. Ibindi bihugu biri kure cyane mu gupima, ni yo mpamvu bitangaza abarwayi bake.”
Leta Zunze Ubumwe z’Amerika zifite abaturage barenga miliyoni 328 nk’uko bigaragara mu mibaro yo mu 2019. Zimaze kugaragaramo abanduye Covid-19 barenga miliyoni imwe n’ibihumbi 70, mu barenga miliyoni eshatu n’ibihumbi 200 bagaragaye ku Isi yose.
