Rutahizamu Cristiano Ronaldo yagaragaye mu myambaro gakondo yo mu Burasirazuba bwo Hagati yifatanya n’igihugu cya Arabie Saoudite mu birori ngarukamwaka byo kwizihiza ishingwa ry’iki gihugu.
Kapiteni w’ikipe y’igihugu ya Portugal na Al Nassr, Cristiano Ronaldo yafotowe yambaye igishura gakondo, afite inkota ishashagirana mu kiganza cy’iburyo ndetse yiteye ibendera ry’igihugu cya Arabie Saoudite mu bitugu mu birori by’akataraboneka byo kwizihiza ishingwa rya Arabie Saoudite atuyemo kuri ubu.
Abinyujije ku rubuga rwe rwa Instagram, Cristiano yagize ati:” Umunsi mwiza w’ishingwa rya Saudi Arabia! Byari iby’agaciro kwishimana muri ibi birori.”
Cristiano yambaye igishura cya Daglah, kikaba ari cyo gifatwa nk’imwambaro gakondo ku bagabo
Agaragiwe na bagenzi be bakinana muri Al Nassr, abayobozi b’ishyirahamwe ry’umupira w’amaguru muri Arabie Saoudite, n’abayobozi batandukanye muri iki gihugu, Cristiano Ronaldo yashinjagiranaga akanyamuneza mu maso muri ibi birori.
Cristiano afite ibendera ari kumwe na ba Sheikh
Muri rusange buri tariki 22 Gashyantare buri mwaka Abanya-Arabie Saoudite n’inshuti z’iki gihugu bagira ikiruhuko cy’akazi mu gihugu hose maze bakifatanya mu birori byo kwishimira ishingwa ry’iki gihugu ryabaye mu binyejana bitatu bishize .
Abitabiriye ibi birori bose bari bishimye
Abayobozi hirya no hino ku Isi boherereje Umwami Salman bin Abdulaziz n’igikomangima Prince Mohammed bin Salman bari hamwe na Cristiano ubutumwa bwerekana ko bifatanyije.
Cristiano ari kumwe na Tarrisca basanzwe bafatanya gushakira Al Nassr ibitego
Cristiano asoma ka kawa ategereje ibindi bikorwa nk’uko byari biteganyijwe
Nubwo Cristiano Ronaldo atatsinze mu mikino ibiri ya mbere yakiniye Al Nassr, ubu afite ibitego 5 n’imipira 2 yavuyemo ibitego. Ni we mukinnyi ufite ibitego byinshi mu mukino umwe (4), akanaba uwatanze imipira myinshi yavuyemo ibitego (2); ibituma akomeza kuba inyenyeri mu Burasirazuba bwo Hagati.
