Cecilia Barbara Atim Ogwal, Umudepite ukomeye muri Uganda wari uhagarariye abagore watorewe mu Karere ka Dokolo akaba yarabaye na Miss Uganda, yapfuye ku myaka 77.
Ogwal wavutse ku itariki ya 12 Kamena 1946, yari umushoramari ukorana n’ingabo z’igihugu ndetse akaba n’umujyanama mu micungire, yabaye umwe mu bagize inteko ishinga amategeko ya Uganda kuva mu 1996
Mu 1969, ku myaka 23, yatsindiye ikamba rya Miss Uganda.
Abagize umuryango we wa hafi bavuze ko Ogwal yazize kanseri akaba yapfiriye mu bitaro byo mu Buhinde mu gitondo cyo kuri uyu wa Kane.
Umwe mu bahisemo kudatangaza amazina ye yagize ati: “Birababaje, Mama Cecilia Ogwal ntakiriho, yagiye.”
Umuvugizi w’Inteko ishinga amategeko, Chris Obore yari atarasubiza ubutumwa bushaka ibisobanuro birambuye ubwo iyi nkuru yandikwaga.
Ogwal yabaye umwe mu bagize komite y’inteko ishinga amategeko y’ibikorwa Remezo ishinzwe kugenzura no kwita ku bibazo bya politiki bijyanye n’ubutaka, imiturire, iterambere ry’imijyi, imirimo, ubwikorezi, n’igenamigambi .
Yabaye kandi umwe mu bagize komite ishinzwe ingengo y’imari.
Mu 1967, afite imyaka 21, yemerewe kwinjira muri kaminuza ya Afurika y’Iburasirazuba i Nairobi (ubu izwi nka Kaminuza ya Nairobi) aho yakuye impamyabumenyi y’icyiciro cya kabiri cya kaminuza mu by’ubucuruzi.
Yarangije muri kaminuza ya Nairobi mu 1970. Afite kandi Impamyabumenyi mu micungire y’abakozi yakuye mu cyahoze cyitwa Institute of Public Administration, ariko ubu izwi ku izina rya Uganda Management Institute.
